വാഷിങ്ടണ്‍: മെക്‌സിക്കോയുമായും കാനഡയുമായും വ്യാപാര യുദ്ധം ആസന്നമാവുന്നതിനിടെ ഇന്ത്യയുള്‍പ്പെടുന്ന ബ്രിക്‌സ് രാഷ്ട്രങ്ങള്‍ക്ക് നികുതി ഭീഷണിയുമായ നിയുക്ത അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഡോളറിനെതിരെ നീങ്ങിയാല്‍ ബ്രിക്‌സ് രാജ്യങ്ങള്‍ക്ക് 100 ശതമാനം നികുതി ചുമത്തുമെന്നാണ് ഭീഷണി. 

ബ്രിക്‌സ് രാഷ്ട്രങ്ങള്‍ പുതിയ കറന്‍സി നിര്‍മിക്കാനോ യു.എസ്. ഡോളറിന് പകരം മറ്റൊരു കറന്‍സിയെ പിന്തുണയ്ക്കാനോ ശ്രമിച്ചാല്‍ 100% ചുങ്കം ചുമത്തുമെന്ന് സ്വന്തം സാമൂഹികമാധ്യമ പ്ലാറ്റ്‌ഫോമായ ട്രൂത്ത് സോഷ്യലില്‍ ട്രംപ് കുറിച്ചു. ഇക്കാര്യത്തില്‍ ബ്രിക്‌സ് രാജ്യങ്ങളില്‍നിന്ന് ഉറപ്പ് വേണമെന്നും ട്രംപ് വ്യക്തമാക്കുന്നു. മറിച്ചൊരു ശ്രമമുണ്ടായാല്‍ അമേരിക്കന്‍ വിപണിയോട് വിടപറയേണ്ടിവരുമെന്നും ട്രംപ് മുന്നറിയിപ്പ് നല്‍കുന്നു.

ബ്രസീല്‍, റഷ്യ, ഇന്ത്യ, ചൈന, ദക്ഷിണാഫ്രിക്ക എന്നീ രാജ്യങ്ങളാണ് ബ്രിക്‌സില്‍ ഉള്‍പ്പെടുന്നത്. കഴിഞ്ഞ മാസം റഷ്യയിലെ കസാനില്‍ നടന്ന സമ്മേളനത്തില്‍ ഡോളറല്ലാത്ത കറന്‍സി ഉപയോഗിച്ച് വ്യാപാരം നടത്തുന്നത് ബ്രിക്‌സ് രാജ്യങ്ങള്‍ ചര്‍ച്ച ചെയ്തിരുന്നു. പ്രാദേശിക കറന്‍സികളെ ശക്തിപ്പെടുത്തുന്നതിന് വേണ്ടിയായിരുന്നു നീക്കം. 

തുടര്‍ന്ന് റഷ്യന്‍ റൂബിളിലും ചൈനീസ് യുവാനിലും ഇന്ത്യന്‍ രൂപയിലും ഇടപാടുകള്‍ നടത്താന്‍ രാജ്യങ്ങള്‍ തീരുമാനിച്ചിരുന്നു. അതേസമയം, ഡീ ഡോളറൈസേഷന്‍ പരിഗണനയിലില്ലെന്ന് ഇന്ത്യയും റഷ്യയും വ്യക്തമാക്കിയിരുന്നു.

Amid rising trade tensions with Mexico and Canada, U.S. President Donald Trump warns BRICS nations, including India, against moving away from the U.S. dollar. Trump stated on his social media platform, Truth Social, that BRICS countries would face a 100% tax if they attempted to create a new currency or support alternatives to the dollar. The warning comes after BRICS nations discussed using local currencies for trade, including the Russian ruble, Chinese yuan, and Indian rupee, in a bid to strengthen regional currencies.