ദുബായ്:  അണ്ടര്‍ 19 ഏഷ്യാ കപ്പ് ക്രിക്കറ്റിലെ ആദ്യ മത്സരത്തില്‍ പാകിസ്ഥാനെതിരേ ഇന്ത്യക്ക് തോല്‍വി. പൊരുതി നോക്കിയെങ്കിലും 43 റണ്‍സിനായിരുന്നു ഇന്ത്യയുടെ തോല്‍വി. 282 റണ്‍സ് വിജയ ലക്ഷ്യം പിന്തുടര്‍ന്ന് ഇറങ്ങിയ ഇന്ത്യ 47.1 ഓവറില്‍ 238 റണ്‍സെടുത്തു പുറത്താകുകയായിരുന്നു. അര്‍ധ സെഞ്ചുറി നേടിയ നിഖില്‍ കുമാറാണ് ഇന്ത്യയുടെ ടോപ് സ്‌കോറര്‍. 77 പന്തുകള്‍ നേരിട്ട താരം 67 റണ്‍സ് നേടി.അവസാന ഓവറുകളില്‍ തകര്‍ത്തടിച്ച മലയാളി താരം മുഹമ്മദ് ഇനാനും ഇന്ത്യയെ വിജയത്തിലെത്തിക്കാന്‍ സാധിച്ചില്ല.

22 പന്തില്‍ രണ്ടു വീതം സിക്‌സുകളും ഫോറുകളും പറത്തിയ ഇനാന്‍ 30 റണ്‍സാണു നേടിയത്. ഇന്ത്യന്‍ ഇന്നിങ്‌സിലെ 48-ാം ഓവറില്‍ ഇനാനെ റണ്‍ഔട്ടാക്കി പാക്കിസ്ഥാന്‍ മത്സരം സ്വന്തമാക്കുകയായിരുന്നു. കിരണ്‍ ചോര്‍മലെ (30 പന്തില്‍ 20), ആയുഷ് മത്രെ (14 പന്തില്‍ 20) എന്നിവരാണ് ഇന്ത്യയുടെ മറ്റു പ്രധാന സ്‌കോറര്‍മാര്‍.ആദ്യം ബാറ്റു ചെയ്ത പാക്കിസ്ഥാന്‍ 50 ഓവറില്‍ ഏഴു വിക്കറ്റ് നഷ്ടത്തില്‍ 281 റണ്‍സെടുത്തു.

ഓപ്പണര്‍ ഷഹ്‌സെയ്ബ് ഖാന്റെ സെഞ്ചുറിയാണ് പാക്കിസ്ഥാനെ മികച്ച സ്‌കോറിലെത്തിച്ചത്. 147 പന്തുകള്‍ നേരിട്ട താരം 159 റണ്‍സെടുത്തു പുറത്തായി. ഉസ്മാന്‍ ഖാന്‍ അര്‍ധ സെഞ്ചുറി (94 പന്തില്‍ 60) നേടി. ഇന്ത്യയ്ക്കായി സമര്‍ഥ് നാഗരാജ് മൂന്നും ആയുഷ് മത്രെ രണ്ടും വിക്കറ്റുകള്‍ വീഴ്ത്തി. മുഹമ്മദ് ഇനാന്‍ രണ്ടോവറുകള്‍ പന്തെറിഞ്ഞെങ്കിലും 34 റണ്‍സ് വഴങ്ങി. നാളെ ജപ്പാനെതിരെയാണ് ഇന്ത്യയുടെ അടുത്ത മത്സരം.