ഹൈദരാബാദ്: പുഷ്പ 2 പ്രീമിയര്‍ ഷോക്കിടെ തിക്കിലും തിരക്കിലും പെട്ട് യുവതി മരിച്ച സംഭവത്തില്‍ തെലുങ്ക് നടന്‍ അല്ലു അര്‍ജുനെതിരെ പൊലിസ് ഉയര്‍ത്തുന്നത് ഗുരുതര ആരോപണങ്ങള്‍. തിരക്ക് നിയന്ത്രണാതീതമാണെന്നും ഒരാള്‍ മരിച്ചെന്നും അറിയിച്ചിട്ടും തിയേറ്റര്‍ വിടാന്‍ അല്ലു അര്‍ജുന്‍ തയ്യാറായില്ലെന്ന് പൊലിസ് ചൂണ്ടിക്കാട്ടു. അര്‍ധരാത്രി വരെ അല്ലു അര്‍ജുന്‍ തിയേറ്ററില്‍ തന്നെ തുടര്‍ന്നു. വീഡിയോ തെളിവുകള്‍ ഉള്‍പ്പടെ പുറത്തുവിട്ടുകൊണ്ടാണ് പൊലിസ് ആരോപണം ഉന്നയിക്കുന്നത്.

ഈ മാസം നാലാം തിയ്യതിയാണ് ഹൈദരാബാദിലെ സന്ധ്യ തിയേറ്ററില്‍ തിക്കിലും തിരക്കിലും പെട്ട് രേവതി എന്ന യുവതി മരിച്ചത്. പിന്നാലെ തന്നെ പൊലിസ് അല്ലു അര്‍ജുനുമായി ബന്ധപ്പെടാന്‍ ശ്രമിച്ചിരുന്നുവെന്ന് സിറ്റി പൊലിസ് കമ്മീഷണര്‍ സി.വി ആനന്ദ് വ്യക്തമാക്കി. എന്നാല്‍ നടനെ നേരിട്ട് ബന്ധപ്പെടാന്‍ പൊലിസിനെ അനുവദിച്ചില്ല. യുവതി മരിച്ചുവെന്നും, കൂടുതല്‍ തിരക്ക് ഇല്ലാതിരിക്കാന്‍ ഉടന്‍ തിയേറ്റര്‍ വിടണമെന്നും നടന്റെ മാനേജരെ അറിയിച്ചിരുന്നു. എന്നാല്‍ നിര്‍ദേശം അവഗണിച്ചുകൊണ്ട് അര്‍ധരാത്രി വരെ അല്ലു തിയേറ്ററില്‍ സിനിമ കാണുന്നത് തുടര്‍ന്നുവെന്നും അദ്ദേഹം മാധ്യമങ്ങളോട് പറഞ്ഞു.

രേവതിയുടെ മരണത്തെ തുടര്‍ന്ന് അല്ലു അര്‍ജുനും സുരക്ഷാ ഉദ്യോഗസ്ഥര്‍ക്കും തിയറ്റര്‍ ഉടമകള്‍ക്കുമെതിരെ കേസെടുത്തിരുന്നു. കേസില്‍ അല്ലു അര്‍ജുനെ ഹൈദരാബാദ് പൊലിസ് അറസ്റ്റ് ചെയ്തിരുന്നു. ജാമ്യം നേടിയ അല്ലു അടുത്ത ദിവസം രാവിലെ ജയില്‍ മോചിതനായി.

Telugu actor Allu Arjun faces serious allegations after a woman tragically died in a stampede at a Pushpa 2 premiere show in Hyderabad.