ദക്ഷിണ കൊറിയയിലെ മൂവാൻ അന്താരാഷ്ട്ര വിമാനത്താവളത്തിൽ ലോകത്തെ ഞെട്ടിച്ച വിമാനദുരന്തമാണ് കഴിഞ്ഞദിവസം ഉണ്ടായത്. തായ്ലന്റിൽ നിന്ന് വന്ന ജെജു എയറിൻ്റെ ബോയിങ് 737-800 വിമാനമാണ് ബെല്ലി ലാൻഡിങ് നടത്തി റൺവേയും കടന്ന് സുരക്ഷാ മതിലിൽ ഇടിച്ച് തീപിടിച്ച് പൊട്ടിത്തെറിക്കുകയായിരുന്നു. 197 പേർ കൊല്ലപ്പെട്ട അപകടത്തിൽ നിന്ന് രണ്ടുപേർ മാത്രമാണ് രക്ഷപ്പെട്ടത്.

മൂവാൻ അപകടത്തിൻ്റെ പശ്ചാത്തലത്തിൽ വിമാനയാത്രക്കാർക്കിടയിൽ സുരക്ഷ സംബന്ധിച്ച ആശങ്കകൾ ഏറുന്നതായാണ് പുതിയ റിപ്പോർട്ടുകൾ വ്യക്തമാക്കുന്നത്. മുൻകൂട്ടി ബുക്ക് ചെയ്‌ത വിമാനടിക്കറ്റുകൾ യാത്രക്കാർ കൂട്ടമായി റദ്ദാക്കുകയാണെന്ന് ദക്ഷിണകൊറിയൻ വാർത്താ ഏജൻസിയായ യോൻഹാപ് റിപ്പോർട്ട് ചെയ്യുന്നു. അപകടത്തിൽപ്പെട്ട ജെജു എയറിൻ്റെ യാത്രക്കാരാണ് ടിക്കറ്റുകൾ റദ്ദാക്കിയത്.

കൊറിയൻ സമയം തിങ്കളാഴ്‌ച ഉച്ചയ്ക്ക് ഒരുമണി വരെ മാത്രം 68,000-ത്തോളം ടിക്കറ്റുകൾ റദ്ദാക്കപ്പെട്ടുവെന്ന് ജെജു എയർ പറയുന്നു. ഇതിൽ 33,000 ടിക്കറ്റുകൾ ആഭ്യന്തര സർവിസുകളിലേയും 34,000 ടിക്കറ്റുകൾ അന്താരാഷ്ട്ര സർവിസുകളിലേയുമാണ്. അപകടം സംഭവിച്ച ഞായറാഴ്‌ച രാവിലെ ഒമ്പത് മണി മുതൽ റദ്ദാക്കപ്പെട്ട ടിക്കറ്റുകളുടെ കണക്കാണിത്.

A devastating plane crash in South Korea has led to a massive cancellation of flights. Jeju Air, the airline involved in the crash, has reported that over 68,000 flight bookings were cancelled between midnight on Sunday and 1:00 pm Monday

നിരവധി പേർ നേരത്തേ ബുക്ക് ചെയ്‌ത ടൂർ പാക്കേജുകളും റദ്ദാക്കി. കൊറിയയിലെ ട്രാവൽ ഏജൻസികളും ഇതോടെ പ്രതിസന്ധിയിലായതായി പ്രാദേശിക മാധ്യമങ്ങൾ റിപ്പോർട്ട് ചെയ്‌തു. കൂടാതെ ട്രാവൽ ഏജൻസികൾ ടെലിവിഷൻ, ഓൺലൈൻ പരസ്യങ്ങളും പ്രൊമോഷണൽ ക്യാമ്പെയിനുകളും നിർത്തിവെച്ചു.