സിഡ്‌നി: ബോർഡർ ഗവാസ്കർ ട്രോഫിയിലെ അവസാന മത്സരത്തിൽ ഇന്ത്യയെ ആറ് വിക്കറ്റുകൾക്ക് പരാജയപ്പെടുത്തി ഓസ്‌ട്രേലിയ പരമ്പര സ്വന്തമാക്കിയിരിക്കുകയാണ്. അഞ്ചു മത്സരങ്ങളുടെ പരമ്പര ഓസ്‌ട്രേലിയ 2-1നാണ് സ്വന്തമാക്കിയത്. ഈ വിജയത്തോടെ ഓസിട്രേലിയ വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനലിലേക്ക് മുന്നേറുകയും ഇന്ത്യ പുറത്താവുകയും ചെയ്തു. നീണ്ട 11 വർഷങ്ങൾക്ക് ശേഷമാണ് ഇന്ത്യ ഓസ്‌ട്രേലിയയിൽ മണ്ണിൽ ടെസ്റ്റ് പരമ്പരയിൽ പരാജയപ്പെടുന്നത്. 

ഈ തോൽവിക്ക് പിന്നാലെ ഇന്ത്യൻ താരങ്ങൾക്ക് ഒരു നിർദ്ദേശം നൽകിയിരിക്കുകയാണ് പരിശീലകൻ ഗൗതം ഗംഭീർ. താരങ്ങൾ ആഭ്യന്തര മത്സരങ്ങൾ കളിക്കണമെന്നാണ് ഗംഭീർ പറഞ്ഞത്. ഇതിനു പുറമെ രോഹിത് ശർമ്മ, വിരാട് കോഹ്‌ലി എന്നിവരെക്കുറിച്ചും ഗംഭീർ സംസാരിച്ചു. മത്സരശേഷമുള്ള വാർത്താ സമ്മേളനത്തിലാണ് ഗംഭീർ ഇക്കാര്യം പറഞ്ഞത്. 

'എല്ലാവരും ടീമിനൊപ്പം ലഭ്യമാണെങ്കിൽ എല്ലാ താരങ്ങളും ആഭ്യന്തര ക്രിക്കറ്റ് കളിക്കണമെന്ന് ഞാൻ എപ്പോഴും ആഗ്രഹിക്കുന്നു. നിങ്ങൾക്ക് റെഡ് ബോൾ ക്രിക്കറ്റ് കളിക്കാനുള്ള പ്രതിബദ്ധതയുണ്ടെങ്കിൽ ആഭ്യന്തര ക്രിക്കറ്റിൽ കളിക്കണം. ഇന്ത്യൻ ക്രിക്കറ്റിന് ഏറ്റവും മികച്ചത് എന്താണെന്ന് കോഹ്‌ലിയും രോഹിത്തും തീരുമാനിക്കും. ഡ്രസ്സിംഗ് റൂം എപ്പോഴും സന്തോഷത്തോടെ നിലനിൽക്കണം. അതിനായി ഞാൻ എല്ലാവരോടും സത്യസന്ധനും നീതിയും പുലർ ഗംഭീർ പറഞ്ഞു.

ഇനി ഇന്ത്യയുടെ മുന്നിലുള്ളത് ഇംഗ്ലണ്ടിനെതിരായ പരമ്പരയാണ്. അഞ്ച് ട്വന്റി ട്വന്റിയും മൂന്ന് ഏകദിനവുമാണ്‌ ഇന്ത്യ ഇംഗ്ലണ്ടിനെതിരെ കളിക്കുക. ഇംഗ്ലണ്ടിനെതിരെയുള്ള ട്വന്റി ട്വന്റി പരമ്പര ജനുവരി 22 മുതൽ ഫെബ്രുവരി രണ്ട് വരെയാണ് നടക്കുക. ഏകദിന പരമ്പര ഫെബ്രുവരി ആറ് മുതൽ  ഫെബ്രുവരി 12  വരെയും നടക്കും. ഇത് കഴിഞ്ഞാൽ ചാമ്പ്യൻസ് ട്രോഫിയിലാണ് ഇന്ത്യ കളിക്കുക. ടൂർണമെന്റിൽ ഗ്രൂപ്പ് എയിൽ ആണ് ഇന്ത്യ ഉള്ളത്. ബംഗ്ലാദേശ്, പാകിസ്താൻ, ന്യൂസിലാൻഡ് എന്നീ ടീമുകളാണ് ഇന്ത്യയുടെ ഗ്രൂപ്പിൽ ഉള്ളത്.