കൊല്ലം: കോട്ടയം വഴിയുള്ള തിരുവനന്തപുരം - കാസകോട് വന്ദേഭാരത്  എക്‌സ്പ്രസ് (20634/33) 20 കോച്ചുകളുമായി പത്താം തീയതി മുതല്‍ ഓടിത്തുടങ്ങും. നിലവില്‍ വെള്ളനിറത്തിലുള്ള 16 കോച്ചുകളുമായാണ് ഈ ട്രെയിന്‍ സര്‍വിസ് നടത്തുന്നത്. 
ഓറഞ്ച് നിറത്തിലുള്ളതാണ് 20 കോച്ചുകളുള്ള പുതിയ വന്ദേഭാരത്. 18 ചെയർ കാർ കോച്ചുകളും രണ്ട് എക്സിക്യൂട്ടീവ് ക്ലാസ് കോച്ചുകളുമുണ്ട്.

ട്രെയിന്‍ രണ്ട് ദിവസം മുമ്പ് ചെന്നൈയില്‍ നിന്ന് കൊച്ചുവേളിയില്‍ എത്തിച്ചിരുന്നു.  നിലവിലെ  16 കോച്ചുള്ള ട്രെയിൻ ദക്ഷിണ റെയില്‍വേയുടെ വന്ദേഭാരത് എക്‌സ്പ്രസുകള്‍ അറ്റകുറ്റപ്പണികള്‍ക്കായി മാറ്റുമ്പോള്‍ സ്‌പെയറായാകും തല്‍ക്കാലം ഉപയോഗിക്കുക. അതേസമയം,  ഒഴിവാക്കുന്ന 16 കോച്ചുകളുള്ള ട്രെയിൻ ആലപ്പുഴ വഴിയുള്ള തിരുവനന്തപുരം – മംഗളൂരു വന്ദേഭാരത് സർവിസിന് ഉപയോഗിക്കണമെന്ന ആവശ്യം ശക്തമാണ്. ഇപ്പോൾ ഈ ട്രെയിനിൽ എട്ട് കോച്ചുകളാണുള്ളത്.