തിരുവനന്തപുരം: പി.ശശി പറഞ്ഞിട്ടാണ് പ്രതിപക്ഷ നേതാവ് വി.ഡി. സതീശനെതിരെ ആരോപണം ഉന്നയിച്ചതെന്ന് പി.വി .അന്‍വര്‍. താന്‍ തന്നെ ഉന്നയിക്കണമെന്ന് പി. ശശി ആവശ്യപ്പെട്ടു. പാര്‍ട്ടി ഏല്‍പ്പിച്ച ഭാരം താന്‍ നിറവേറ്റി. എല്ലാം ശരിയാണെന്ന് പി. ശശി പറഞ്ഞു. സ്പീക്കറുടെ അനുമതിയോടെയാണ് ആരോപണം ഉന്നയിച്ചത്. ശശി തന്നെ ഒരു സ്ഥലത്ത് കൊണ്ടു പോയി ബ്ലോക്ക് ചെയ്യണമെന്ന് നേരത്തെ തീരുമാനിച്ചിരുന്നു. 

പിതാവിന് തുല്യം സ്‌നേഹിക്കുകയും ബഹുമാനിക്കുകയും ചെയ്യുന്ന മുഖ്യമന്ത്രിയേയും കുടുംബത്തേയും സഭയിലിട്ട് ആക്രമിക്കുന്നത് കണ്ടതിന്റെ മാനസിക സംഘര്‍ഷത്തിലാണ് അന്ന് താന്‍ ആ വിഷയം സഭയില്‍ അവതരിപ്പിച്ചതെന്നും അന്‍വര്‍ പറഞ്ഞു.

പാര്‍ട്ടി ഏല്‍പിച്ച കാര്യം മാത്രമാണ് താന്‍ ചെയ്തത്. പക്ഷേ, വിജിലന്‍സ് അന്വേഷണത്തില്‍ അതില്‍ കഴമ്പില്ലെന്ന് തെളിഞ്ഞു. കോണ്‍ഗ്രസ് നേതൃത്വത്തിന് മുന്നില്‍ ശത്രുവായി അവതരിപ്പിക്കാനാണോ അന്നങ്ങനെ ഒരു പ്ലാനിങ് നടന്നതെന്ന് അറിയില്ല. അന്ന് നടന്ന സംഭവത്തില്‍ വി.ഡി സതീശനുണ്ടായ മാനഹാനിക്ക് കേരളസമൂഹത്തോട് മാപ്പ് പറയുകയാണെന്നും അന്‍വര്‍ കൂട്ടിച്ചേര്‍ത്തു.

സ്പീക്കറെ കണ്ട് രാജിക്കത്ത് നല്‍കിയശേഷം തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അന്‍വര്‍. എല്‍.ഡി.എഫിനൊപ്പമുള്ള യാത്രയില്‍ കൂടെ നിന്ന എല്ലാവര്‍ക്കും നന്ദി പറഞ്ഞാണ് എം.എല്‍.എ വാര്‍ത്താസമ്മേളനം ആരംഭിച്ചത്. രാജി പോരാട്ടത്തിന്റെ അടുത്തഘട്ടം മാത്രമാണെന്ന് അദ്ദേഹം പറഞ്ഞു

കേരളത്തിലെ ജനങ്ങള്‍ക്ക് നന്ദി. നിലമ്പൂരില്‍ വിജയിപ്പിച്ച ജനങ്ങള്‍ക്ക് നന്ദി. എം.എല്‍.എയാവാന്‍ സഹായിച്ച ഇടതുപക്ഷ നേതാക്കള്‍ക്കും പ്രവര്‍ത്തകര്‍ക്കും നന്ദി. 11ാം തിയതി സ്പീക്കര്‍ക്ക് രാജിവയ്ക്കുമെന്ന് ഇമെയില്‍ വഴി അറിയിച്ചിരുന്നു. രാജി സ്വീകരിക്കേണ്ടത് സ്പീക്കറാണ്- അന്‍വര്‍ പറഞ്ഞു. 

മമത ബാനര്‍ജിയോട് വീഡിയേ കോണ്‍ഫറന്‍സ് വഴി സംസാരിച്ചിരുന്നു. വന്യജീവി ആക്രമണവുമായി ബന്ധപെട്ട വിഷയങ്ങളാണ് ചര്‍ച്ച നടത്തിയത്. പാര്‍ലമെന്റില്‍ വന്യജീവി പ്രശ്‌നങ്ങള്‍ ഉയര്‍ത്തണമെന്ന് പറഞ്ഞു.പാര്‍ലമെന്റില്‍ ഈ വിഷയം ഉന്നയിക്കാമെന്ന് മമ്മത ബനാര്‍ജി അറിയിച്ചു. രാഹുല്‍ ഗാന്ധിയുമായും വിഷയം ചര്‍ച്ച ചെയ്യാമെന്ന് മമത ഉറപ്പ് നല്‍കി.