ഇറ്റലി: സീരി എയിൽ ഇറ്റാലിയൻ ഇതിഹാസം പൗലോ മാൾഡീനിയുടെ ഗോൾ സ്കോറിങ് റെക്കോർഡ് മറികടന്ന് ഫ്രഞ്ച് താരം തിയോ ഹെർണാണ്ടസ്. മൊക്കോക്കെതിരായ മത്സരത്തിൽ നേടിയ ഗോളിന് പിന്നാലെയാണ് ഹെർണാണ്ടസ് ഈ തകർപ്പൻ നേട്ടം സ്വന്തമാക്കിയത്. ഇറ്റാലിയൻ ലീഗിൽ എസി മിലാന് വേണ്ടി ഏറ്റവും കൂടുതൽ ഗോൾ നേടുന്ന ഡിഫൻഡറായാണ് ഹെർണാണ്ടസ് മാറിയത്, 

ഇറ്റാലിയൻ ലീഗിലെ തന്റെ 30ാം ഗോളായിരുന്നു ഹെർണാണ്ടസ് കോമോക്കെതിരെ നേടിയത്. 29 ഗോളുകൾ നേടിയ മാൽഡീനിയെ രണ്ടാം സ്ഥാനത്തേക്ക് പിന്തള്ളിയാണ് ഫ്രഞ്ച് താരം ഈ നേട്ടത്തിലെത്തിയത്.

മത്സരത്തിൽ കോമോക്കെതിരെ ഒന്നിനെതിരെ രണ്ട് ഗോളുകളുടെ വിജയമാണ് എസി മിലാൻ സ്വന്തമാക്കിയത്. മത്സരത്തിന്റെ ആദ്യ പകുതിയിൽ ഇരുടീമുകൾക്കും ഗോൾ നേടാൻ സാധിച്ചിരുന്നില്ല. രണ്ടാം പകുതിയിൽ 60ാം മിനിറ്റിൽ അസാൻ ദിയവോയിലൂടെ കോമോയാണ് ആദ്യം ലീഡ് നേടിയത്. എന്നാൽ ഹെർണാണ്ടസിന്റേയും റാഫേൽ ലിയോയുടെയും ഗോളിലൂടെ എസി മിലാൻ വിജയിക്കുകയായിരുന്നു.

നിലവിൽ സീരി എയിൽ ഏഴാം സ്ഥാനത്താണ് എസി മിലാൻ. 19 മത്സരങ്ങളിൽ നിന്നും എട്ട് വിജയവും ഏഴ് സമനിലയും നാല് തോൽവിയുമായി 31 പോയിന്റാണ് എസി മിലാന്റെ കൈവശമുള്ളത്. ജനുവരി 18ന് യുവന്റസിനെതിരെയാണ് എസി മിലാന്റെ അടുത്ത മത്സരം. യുവന്റസിന്റെ തട്ടകമായ അലിയൻസ് സ്റ്റേഡിയത്തിലാണ് മത്സരം നടക്കുക.