വാഷിംഗ്ടൺ: ബ്രസീലിയൻ സൂപ്പർതാരം നെയ്മറെ സ്വന്തമാക്കാൻ എംഎൽഎസ് ക്ലബായ ചിക്കാഗോ ഫയർ ശ്രമിക്കുന്നുവെന്ന് റിപ്പോർട്ടുകൾ. ബ്രസീലിയൻ താരവുമായി അമേരിക്കൻ ക്ലബ് ചർച്ചകൾ നടത്തിയെന്നാണ് വിവരങ്ങൾ. ചിക്കാഗോ ഫയർ നെയ്മറിന് രണ്ട് വർഷത്തെ കരാർ വാഗ്ദാനം നൽകിയെന്നാണ് റിപ്പോർട്ടുകൾ. ഈ ട്രാൻസ്ഫർ നടക്കുകയാണെങ്കിൽ നെയ്മർ തന്റെ പഴയ സഹതാരങ്ങളായ ലയണൽ മെസി, ലൂയി സുവാരസ് എന്നിവർക്കെതിരെ കളിക്കുന്നത് ഫുട്ബോൾ ആരാധകർക്ക് കാണാൻ സാധിക്കും. 

നിലവിൽ സഊദി ക്ലബായ അൽ ഹിലാലിന്റെ താരമാണ് നെയ്മർ. എന്നാൽ പരുക്ക് വില്ലനായി എത്തിയതോടെ അൽ ഹിലാലിനൊപ്പമുള്ള ധാരാളം മത്സരങ്ങൾ നെയ്മറിന് നഷ്ടമായിരുന്നു. 2023ൽ നടന്ന ലോകകപ്പ് യോഗ്യത മത്സരത്തിൽ ഉറുഗായ്ക്കെതിരെയുള്ള മത്സരത്തിലായിരുന്നു നെയ്മറിന് പരുക്ക് പറ്റിയിരുന്നത്. 

ഇതിനു പിന്നാലെ നെയ്മർ ശസ്ത്രക്രിയക്ക് വിധേയനാവുകയും ഫുട്ബാളിൽ നിന്നും നീണ്ട കാലത്തേക്ക് പുറത്താവുകയും ആയിരുന്നു. പിന്നീട് ഒക്ടോബറിൽ താരം വീണ്ടും അൽ ഹിലാലിനായി കളത്തിൽ ഇറങ്ങിയിരുന്നു. രണ്ട് മത്സരങ്ങളിലായിരുന്നു താരം കളിച്ചത്. നീണ്ട കാലങ്ങൾക്ക് ശേഷം നെയ്മർ അൽ ഹിലാലിനായി ഗോൾ നേടിയിരുന്നു. മിഡ് സീസൺ സൗഹൃദ മത്സരത്തിൽ അൽ ഫെയ്‌ഹക്കെതിരെയാണ് നെയ്മർ ഗോൾ നേടിയത്.