ദുബൈ: 2024ല്‍ ലോകത്തിലെ ഏറ്റവും തിരക്കേറിയ അന്താരാഷ്ട്ര വിമാനത്താവളമെന്ന് റെക്കോര്‍ഡ് നിലനിര്‍ത്തി ദുബൈ അന്താരാഷ്ട്ര വിമാനത്താവളം. 6.02 കോടി യാത്രക്കാരാണ് ദുബൈ അന്താരാഷ്ട്ര വിമാനത്താവളം വഴി യാത്ര ചെയതത്.

2023നെ അപേക്ഷിച്ച് 2024ല്‍ എയര്‍ലൈന്‍ ശേഷിയില്‍ 7% വര്‍ധവുണ്ടായിട്ടുണ്ടെന്നും 2019ല്‍ നിന്നും 12 ശതമാനം വര്‍ധനവാണ് രേഖപ്പെടുത്തിയതെന്നും ഏവിയേഷന്‍ അനലിറ്റിക്‌സ് കമ്പനിയായ ഒഎജി വ്യക്തമാക്കി. അന്താരാഷ്ട്ര എയര്‍ലൈന്‍ ശേഷി കണക്കാക്കിയാണ് ഏറ്റവും തിരക്കേറിയ അന്താരാഷ്ട്ര വിമാനത്താവളത്തെ തിരഞ്ഞെടുക്കുന്നത്. 

അതേസമയം ഏറ്റവും തിരക്കേറിയ 10 ആഗോള വിമാനത്താവളങ്ങള്‍ ആകെ എയര്‍ലൈന്‍ ശേഷി അടിസ്ഥാനമാക്കിയാണ് കണക്കാക്കുന്നത്. 2024ല്‍ ഏറ്റവും തിരക്കേറിയ ആഗോള വിമാനത്താവളങ്ങളില്‍ ദുബൈയ്ക്ക് രണ്ടാം സ്ഥാനമുണ്ട്.
ദുബൈ അന്താരാഷ്ട്ര വിമാനത്താവളത്തില്‍ നിന്നും 106 രാജ്യങ്ങളിലായി 269 ലക്ഷ്യസ്ഥാനങ്ങളിലേക്ക് സര്‍വ്വീസുകളുണ്ട്. ആകെ 101 രാജ്യാന്തര എയര്‍ലൈനുകള്‍ സര്‍വ്വീസ് നടത്തുന്നു. ദുബൈയില്‍ നിന്ന് കൂടുതല്‍ വിമാനങ്ങളും പോകുന്നത് ഇന്ത്യ, സഊദി, യുകെ, പാകിസ്ഥാന്‍ എന്നിവിടങ്ങളിലേക്കാണ്. അതേസമയം 2024ലെ ആദ്യ പകുതിയില്‍ നാലരക്കോടിയോളം യാത്രക്കാരാണ് ദുബൈ എയര്‍പോര്‍ട്ടിലൂടെ യാത്ര ചെയ്തത്.

Dubai Airport is the busiest international airport in the world