കുവൈത്ത് സിറ്റി: 2025ലെ ആദ്യഘട്ട വധശിക്ഷയില്‍ മൂന്ന് പുരുഷന്മാരും ഒരു യുവതിയും ഒരു അറബ് പ്രവാസിയും ഉള്‍പ്പെടെ അഞ്ച് പേരെ ഞായറാഴ്ച രാവിലെ ആഭ്യന്തര മന്ത്രാലയം വധിച്ചു. ആസൂത്രിതമായി കൊലപാതകം ചെയ്ത കുറ്റത്തിന് ശിക്ഷിക്കപ്പെട്ടവരും വധശിക്ഷക്ക് വിധേയരാക്കപ്പെട്ടവരില്‍ ഉള്‍പ്പെട്ടിരുന്നു. 

എന്നാല്‍ അവരില്‍ മൂന്ന് പേര്‍ വധശിക്ഷ നടപ്പാക്കുന്നതിന് മണിക്കൂറുകള്‍ക്ക് മുമ്പ് ഇരകളുടെ രക്തബന്ധുക്കളില്‍ നിന്ന് മാപ്പ് ലഭിച്ചതിനാല്‍ കഴുമരത്തില്‍ നിന്ന് രക്ഷപ്പെട്ടു. ഇവര്‍ക്കെതിരെ പുറപ്പെടുവിച്ച ജുഡീഷ്യല്‍ വിധിയുടെ അടിസ്ഥാനത്തിലാണ് സെന്‍ട്രല്‍ ജയില്‍ കെട്ടിടത്തില്‍ വെച്ച് വധശിക്ഷ നടപ്പാക്കിയതെന്ന് സുരക്ഷാ വൃത്തങ്ങള്‍ അറിയിച്ചു. വധശിക്ഷയ്ക്ക് വിധിക്കപ്പെട്ടവരില്‍ തീവ്രവാദ സംഘടനയുമായി ബന്ധമുള്ള ഒരു കുവൈത്ത് പൗരനുമുണ്ടായിരുന്നു. 

സബാഹ് അല്‍യില്‍ സുഹൃത്തിനെ കൊലപ്പെടുത്തിയ കേസില്‍ വധശിക്ഷയ്ക്ക് വിധേയയായ കുവൈത്ത് യുവതിയേയും വധശിക്ഷക്ക് വിധേയയാക്കി. ഇരയുടെ രക്തബന്ധുക്കളില്‍ നിന്ന് മാപ്പ് നേടാനുള്ള ശ്രമം നടക്കുന്നതിനാല്‍ സെപ്തംബര്‍ മുതല്‍ യുവതിക്കെതിരെ പുറപ്പെടുവിച്ച ശിക്ഷ വൈകിപ്പിക്കുകയായിരുന്നു. കബാദില്‍ ഒരാളെ കൊലപ്പെടുത്തിയ കുവൈത്തി പൗരനെയും വധിച്ചു. 

ശിക്ഷിക്കപ്പെട്ടവരില്‍ മൂന്നുപേര്‍ക്ക് മാപ്പു ലഭിച്ചു. ഒരാള്‍ ഇതിനകം തന്നെ മാപ്പ് സംബന്ധിച്ച നടപടിക്രമങ്ങള്‍ പൂര്‍ത്തിയാക്കുകയും ചെയ്തു. മറ്റുള്ളവര്‍ ഇരകളുടെ രക്തബന്ധുക്കളില്‍ നിന്ന് മാപ്പ് നേടിയെടുക്കുന്നതിനുള്ള പ്രക്രിയയിലായിരുന്നുവെന്ന് ഉറവിടങ്ങള്‍ വെളിപ്പെടുത്തി. കഴിഞ്ഞ സെപ്റ്റംബറില്‍ ആഭ്യന്തര മന്ത്രാലയം പുറപ്പെടുവിച്ച ജുഡീഷ്യല്‍ വിധികളുടെ അടിസ്ഥാനത്തിലാണ് വധശിക്ഷ നടപ്പാക്കിയത്.

Kuwait; In the first stage of execution, 5 people were hanged and three people escaped from the gallows at the last moment