വയനാട്: ഡി.സി.സി ട്രഷറര്‍ എന്‍.എം വിജയന്റെ ആത്മഹത്യയില്‍ കെ.പി.സി.സി അധ്യക്ഷന്‍ കെ.സുധാകരനെ ആവശ്യമെങ്കില്‍ ചോദ്യം ചെയ്യുമെന്ന് പൊലിസ്. പ്രശ്‌നങ്ങള്‍ വിവരിച്ച് വിജയന്‍ സുധാകരന് കത്തെഴുതിയിരുന്നു. ഇതിന്റെ പശ്ചാത്തലത്തിലാണ് നടപടി. എന്ന് മൊഴിയെടുക്കുമെന്ന കാര്യം അന്വേഷണസംഘം പിന്നീട് തീരുമാനിക്കും.

2022 ലാണ് കത്ത് എഴുതിയത്. കത്ത് ലഭിച്ചോ എന്നതുള്‍പ്പെടെയുള്ള കാര്യങ്ങളില്‍ വ്യക്തത വരുത്തുന്നതിനായിരിക്കും സുധാകരനെ ചോദ്യം ചെയ്യുന്നത്. 

അതേസമയം, ചോദ്യം ചെയ്യലുമായി ബന്ധപ്പെട്ട് തനിക്ക് നോട്ടിസ് ലഭിച്ചിട്ടില്ലെന്നും അന്വേഷണവുമായി സഹകരിക്കുമെന്നും സുധാകരന്‍ പറഞ്ഞു. 

കേസില്‍ പ്രതിചേര്‍ത്ത ഡി.സി.സി പ്രസിഡന്റ് എന്‍.ഡി അപ്പച്ചനെയും മുന്‍ ട്രഷറര്‍ കെ.കെ ഗോപിനാഥനെയും പൊലിസ് ഇന്നലെ ചോദ്യം ചെയ്തിരുന്നു. അന്വേഷണ ഉദ്യോഗസ്ഥനായ സുല്‍ത്താന്‍ ബത്തേരി ഡിവൈ.എസ്.പി കെ.കെ അബ്ദുല്‍ ഷെരീഫ് മുമ്പാകെയാണ് ഇരുവരും ചോദ്യം ചെയ്യലിനായി ഹാജരായത്.

കേസിലെ മൂന്നാംപ്രതിയായ കെ.കെ ഗോപിനാഥന്റെ വീട്ടില്‍ നടത്തിയ പരിശോധനയില്‍ കേസിന് അനുകൂലമായ രേഖകള്‍ കണ്ടെടുത്തിട്ടുണ്ടെന്ന് പൊലിസ് അറിയിച്ചു. ഇന്നലെ രാവിലെ 10 മുതല്‍ വൈകിട്ട് നാലു വരെയായിരുന്നു ചോദ്യംചെയ്യല്‍. കേസില്‍ ഒന്നാം പ്രതിയായ ഐ.സി ബാലകൃഷ്ണന്‍ എം.എല്‍.എ നിയമസഭ നടക്കുന്നതിനാല്‍ ഈമാസം 23 മുതല്‍ 25 വരെയുള്ള ദിവസങ്ങളിലാണ് അന്വേഷണ ഉദ്യോഗസ്ഥര്‍ മുമ്പാകെ ഹാജരാവുക.

എന്‍.എം വിജയന്റെ മരണവുമായി ബന്ധപ്പെട്ട് ആത്മഹത്യാ പ്രേരണ കുറ്റത്തിന് പ്രതിചേര്‍ക്കപ്പെട്ട മൂന്നുപേര്‍ക്കും കഴിഞ്ഞ ദിവസമാണ് ജില്ലാ സെഷന്‍സ് കോടതി ജാമ്യം അനുവദിച്ചത്. അന്വേഷണത്തോട് പൂര്‍ണമായും സഹകരിക്കണമെന്ന ഉപാധിയോടെയായിരുന്നു ജാമ്യം. ഇതുപ്രകാരമാണ് ഇരുവരും ഇന്നലെ രാവിലെ അന്വേഷണ ഉദ്യോഗസ്ഥന്‍ മുമ്പാകെ ചോദ്യംചെയ്യലിനായി എത്തിയത്.