ക്വാലാലംപൂർ: വിമൺസ് അണ്ടർ 19 ലോകകപ്പിൽ ഇന്ത്യക്ക് രണ്ടാം ജയം. മലേഷ്യയെ 10 വിക്കറ്റുകൾക്കാണ് ഇന്ത്യ പരാജയപ്പെടുത്തിയത്. മത്സരത്തിൽ ആദ്യം ബാറ്റ് ചെയ്ത മലേഷ്യ14.3 ഓവറിൽ 31 റൺസിന്‌ പുറത്താവുകയായിരുന്നു. വിജയലക്ഷ്യം പിന്തുടർന്നിറങ്ങിയ ഇന്ത്യ 2.5  ഓവറിൽ വിക്കറ്റ് ഒന്നും നഷ്ടമാവാതെ ലക്ഷ്യം മറികടക്കുകയായിരുന്നു. 

ഇന്ത്യൻ ബൗളിംഗിൽ ഹാട്രിക് അടക്കം അഞ്ചു വിക്കറ്റുകൾ നേടിയ വൈഷ്ണവി ശർമയാണ് മലേഷ്യയെ തകർത്തത്. നാല് ഓവറിൽ ഒരു മെയ്ഡൻ ഉൾപ്പെടെ അഞ്ചു റൺസ് വഴങ്ങി അഞ്ചു വിക്കറ്റുകളാണ് താരം നേടിയത്. ടൂർണമെൻ്റിൻ്റെ ചരിത്രത്തിലെ എക്കാലത്തെയും മികച്ച ബൗളിംഗ് പ്രകടനമാണ് ഇത്. വൈഷ്ണവി ശർമയുടെ അരങ്ങേറ്റ മത്സരമായിരുന്നു ഇത്. ഈ തകർപ്പൻ പ്രകടനങ്ങൾക്ക് പിന്നാലെ മത്സരത്തിലെ പ്ലയെർ ഓഫ് ദി മാച്ച് അവാർഡും താരം സ്വന്തമാക്കി. വൈഷ്‌ണവിക്ക് പുറമെ ആയുഷി ശുക്ല മൂന്ന് വിക്കറ്റുകളും ജോഷിതാ ഒരു വിക്കറ്റും നേടി മികച്ച പ്രകടനം നടത്തി. 

മലേഷ്യയുടെ ബാറ്റിംഗിൽ ആർക്കും തന്നെ 10 റൺസിന്‌ മുകളിൽ റൺസ് സ്കോർ ചെയ്യാൻ സാധിച്ചില്ല. നാല് താരങ്ങളാണ് പൂജ്യം റൺസിന്‌ പുറത്തായത്. ഇന്ത്യക്കായി ഗോൺഗാഡി തൃഷ 12 പന്തിൽ പുറത്താവാതെ 27 റൺസ് നേടി മികച്ച പ്രകടനം നടത്തി. അഞ്ചു ഫോറുകളാണ് താരത്തിന്റെ ബാറ്റിൽ നിന്നും പിറന്നത്. 

നിലവിൽ രണ്ട് മത്സരങ്ങളും വിജയിച്ചുകൊണ്ട് നാല് പോയിന്റോടെ ഗ്രൂപ്പ് എയിൽ ഒന്നാം സ്ഥാനത്താണ് ഇന്ത്യ. ജനുവരി 23ന് നടക്കുന്ന അടുത്ത മത്സരത്തിൽ ശ്രീലങ്കയെയാണ് ഇന്ത്യ നേരിടുക.