സാൻ്റിയാഗോ ബെർണബ്യൂ: യുവേഫ ചാമ്പ്യൻസ് ലീഗിൽ ആർബി സാൽസ്ബർഗിനെ ഒന്നിനെതിരെ അഞ്ചു ഗോളുകൾക്ക് പരാജയപ്പെടുത്തി റയൽ മാഡ്രിഡ് തകർപ്പൻ വിജയം സ്വന്തമാക്കിയിരുന്നു. റയലിനായി വിനീഷ്യസ് ജൂനിയർ, റോഡ്രിഗോ എന്നിവർ ഇരട്ടഗോളുകളും കിലിയൻ എംബാപ്പെ ഒരു ഗോളും നേടി. 

മത്സരത്തിൽ ജൂഡ് ബെല്ലിങ്ങ്ഹാം ഒരു അസിസ്റ്റ് നേടി മികച്ച പ്രകടനമാണ് നടത്തിയത്. ഇതോടെ ചാമ്പ്യൻസ് ലീഗിൽ റയൽ മാഡ്രിഡിന് വേണ്ടി 24 ഗോൾ കോൺട്രിബ്യുഷൻ നേടാനും ജൂഡിന് സാധിച്ചു. 11 ഗോളുകളും 13 അസിസ്റ്റുകളുമാണ് ജൂഡ് റയലിനായി യുസിഎല്ലിൽ നേടിയത്. ഇതോടെ ലയണൽ മെസിയുടെ ചാമ്പ്യൻസ് ലീഗിലെ റെക്കോർഡിനൊപ്പമെത്താനും ജൂഡിന് സാധിച്ചു. 

21 വയസ്സോ അതിൽ താഴെയോ പ്രായമുള്ളപ്പോൾ ചാമ്പ്യൻസ് ലീഗിൽ 24 ഗോൾ കോൺട്രിബ്യുഷൻ സ്വന്തമാക്കുന്ന താരമെന്ന മെസിയുടെ നേട്ടത്തിനൊപ്പമാണ് ജൂഡ് എത്തിയത്. മെസി ഈ പ്രായത്തിൽ 17 ഗോളുകളും ഏഴു അസിസ്റ്റുകളുമാണ് യുസിഎല്ലിൽ നേടിയത്. ഏർലിങ് ഹാലണ്ടും കിലിയൻ എംബാപ്പെയും ഈ നേട്ടത്തിൽ ജൂഡിനെക്കാൾ മുന്നിലാണ്. ഹാലണ്ട് (37), എംബാപ്പെ (26) എന്നിങ്ങനെയാണ് ഈ പ്രായത്തിൽ നടത്തിയ ഗോൾ കോൺട്രിബ്യുഷന്റെ കണക്കുകൾ.

നിലവിൽ ചാമ്പ്യൻസ് ലീഗ് പോയിന്റ് പട്ടികയിൽ 16 സ്ഥാനത്താണ് റയൽ മാഡ്രിഡ്. ഏഴ് മത്സരങ്ങളിൽ നിന്നും നാല് വിജയവും മൂന്ന്‌ തോൽവിയും അടക്കം 12 പോയിന്റാണ് റയലിന്റെ കൈവശമുള്ളത്.