കൊച്ചി: കൈക്കൂലി വാങ്ങുന്നതിനിടെ പൊലിസ് ഉദ്യോഗസ്ഥന്‍ വിജിലന്‍സ് പിടിയില്‍. കൊച്ചി മുളവുകാട് സ്റ്റേഷനിലെ സിപിഒ അനൂപ് ആണ് പിടിയിലായത്. എറണാകുളം സ്വദേശിയായ കരാറുകാരനില്‍ നിന്ന് 5000 രൂപ കൈക്കൂലി വാങ്ങാന്‍ ശ്രമിക്കുന്നതിനിടെയാണ് ഇയാള്‍ പിടിയിലായത്. കെട്ടിട മാലിന്യം നിക്ഷേപിക്കാന്‍ സൗകര്യമൊരുക്കാമെന്ന് പറഞ്ഞാണ് അനൂപ് കൈക്കൂലി ആവശ്യപ്പെട്ടത്. വാഹനത്തില്‍ വെച്ച് പണം കൈമാറുന്നതിനിടെയാണ് വിജിലന്‍സ് സംഘം പൊലീസ് ഉദ്യോഗസ്ഥനെ കയ്യോടെ പിടികൂടുന്നത്.

അനധികൃതമായി മണ്ണ് കടത്തിയതിനെ തുടര്‍ന്ന് കോണ്‍ട്രാക്ടറെ കസ്റ്റഡിയിലെടുത്തിരുന്നു. പണം നല്‍കിയാണ് ഇയാള്‍ കേസില്‍ നിന്ന് പുറത്തിറങ്ങിയത്. എന്നാല്‍ പിന്നീട് കോണ്‍ട്രാക്ടറുമായി നിരന്തരം ബന്ധപ്പെട്ട അനൂപ് പണം നല്‍കിയാല്‍ കേസുകളില്‍ വിട്ടുവീഴ്ച ചെയ്യാമെന്ന് വിശ്വസിപ്പിക്കുകയും ഇയാളില്‍ നിന്ന് പല തവണ പണം വാങ്ങുകയും ചെയ്തു.