ഷാര്‍ജ: ഷാര്‍ജയില്‍ പ്രകൃതിവിഭവങ്ങളുടെ ഖനന, ഖനനേതര പ്രവര്‍ത്തനങ്ങളില്‍ ഏര്‍പ്പെട്ട കമ്പനികള്‍ക്ക് 20 ശതമാനം കോര്‍പ്പറേറ്റ് നികുതി ഏര്‍പ്പെടുത്തി ഷാര്‍ജ. എണ്ണ, ലോഹങ്ങള്‍, ധാതുക്കള്‍, അഗ്രഗേറ്റുകള്‍ എന്നിവയുള്‍പ്പെടെയുള്ള അസംസ്‌കൃത വസ്തുക്കളുടെയും പ്രകൃതിവിഭവങ്ങളുടെയും വേര്‍തിരിച്ചെടുക്കല്‍, സംസ്‌കരണം എന്നിവയില്‍ ഏര്‍പ്പെട്ടിരിക്കുന്ന കമ്പനികള്‍ക്കാണ് നികുതി ചുമത്തിയിരിക്കുന്നത്. ഇത്തരം കമ്പനികള്‍ എക്‌സ്ട്രാറ്റീവ് കമ്പനികള്‍ എന്നാണ് അറിയപ്പെടുന്നത്. പ്രകൃതിവിഭവങ്ങളുടെ വേര്‍തിരിക്കല്‍, സംഭരണം, ഗതാഗതം, വിപണനം എന്നിവ നോണ്‍ എക്‌സ്ട്രാക്റ്റീവ് കമ്പനികളാണ് കൈകാര്യം ചെയ്യുന്നത്.

സുപ്രീം കൗണ്‍സില്‍ അംഗവും ഷാര്‍ജ ഭരണാധികാരിയുമായ ഷെയ്ഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമി പാസാക്കിയ നിയമം, ഖനന പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന കമ്പനികളും ഖനനമല്ലാത്ത പ്രവൃത്തികളില്‍ ഏര്‍പ്പെട്ടിരിക്കുന്ന കമ്പനികളും കോര്‍പ്പറേറ്റ് നികുതിക്ക് വിധേയമാണെന്ന് വ്യവസ്ഥ ചെയ്യുന്നു.

എക്‌സ്ട്രാക്റ്റീവ് കമ്പനികള്‍ക്കുള്ള കോര്‍പ്പറേറ്റ് നികുതി ഇപ്രകാരം:
1. (ഷാര്‍ജ) എണ്ണ വകുപ്പും കമ്പനിയും തമ്മിലുള്ള കരാറുകളില്‍ നിര്‍വചിച്ചിരിക്കുന്ന സംവിധാനങ്ങളും ഷെഡ്യൂളുകളും പിന്തുടര്‍ന്ന്, നികുതി പട്ടിക അടിസ്ഥാനമാക്കി എക്‌സ്ട്രാക്റ്റീവ് കമ്പനികള്‍ക്ക് 20 ശതമാനം നികുതി ചുമത്തും.

2. എണ്ണ വകുപ്പും കമ്പനിയും തമ്മിലുള്ള വിഭജനത്തില്‍ മൊത്തം റോയല്‍റ്റിയും മറ്റ് ഏതെങ്കിലും പങ്കാളിത്തം വിഭജിക്കുന്ന ഫോര്‍മുലയും അനുസരിച്ച്, ഉല്‍പ്പാദിപ്പിക്കുന്ന എണ്ണയുടെയും വാതകത്തിന്റെയും മൂല്യത്തില്‍ നിന്നുള്ള കമ്പനിയുടെ മൊത്തം വിഹിതത്തെ അടിസ്ഥാനമാക്കി, എക്‌സ്ട്രാക്റ്റീവ് പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന കമ്പനികള്‍ നല്‍കേണ്ട നികുതി കണക്കാക്കും.

3. എക്‌സ്ട്രാക്റ്റീവ് കമ്പനികള്‍ നടത്തുന്ന ഏതെങ്കിലും കണ്‍സഷന്‍ ഏരിയയ്ക്കുള്ള റോയല്‍റ്റി, ബോണസ്, വാര്‍ഷിക വാടക എന്നിവയ്ക്കുള്ള തുകകള്‍ എണ്ണ വകുപ്പും ആ കമ്പനികളും തമ്മില്‍ ഒപ്പുവച്ച കരാര്‍ അനുസരിച്ചായിരിക്കും നിര്‍ണ്ണയിക്കുക.

നോണ്‍ എക്‌സ്ട്രാക്റ്റീവ് കമ്പനികള്‍ക്കുള്ള കോര്‍പ്പറേറ്റ് നികുതി ഇപ്രകാരം:
1. നികുതി പട്ടികയെ അടിസ്ഥാനമാക്കി ഓരോ സാമ്പത്തിക വര്‍ഷവും വേര്‍തിരിച്ചെടുക്കാത്ത പ്രകൃതിവിഭവ കമ്പനികള്‍ക്ക് 20 ശതമാനം നികുതി ചുമത്തും.

2. നോണ്‍ എക്‌സ്ട്രാക്റ്റീവ് കമ്പനികള്‍ നല്‍കേണ്ട നികുതി അടിസ്ഥാനമാക്കി, ഈ നിയമത്തിലെ വ്യവസ്ഥകള്‍ പ്രകാരം കമ്പനിയുടെ മൊത്തം ലാഭത്തെ അടിസ്ഥാനമാക്കി, താഴെപ്പറയുന്ന രീതിയില്‍ ആവശ്യമായ ക്രമീകരണങ്ങള്‍ വരുത്തിയ ശേഷമാകും നികുതി കണക്കാക്കുക:

2.a. ആസ്തിയില്‍ സംഭവിച്ച മൂല്യത്തകര്‍ച്ചയുടെ തുക നല്‍കേണ്ട നികുതിയില്‍ നിന്ന് കുറയ്ക്കാവുന്നതാണ്. നിലവിലുള്ളതല്ലാത്ത ആസ്തി മൂല്യത്തകര്‍ച്ച പ്രതിവര്‍ഷം 20 ശതമാനം നിരക്കില്‍ കണക്കാക്കാം. മൂല്യത്തകര്‍ച്ചയ്ക്കുള്ള അക്കൗണ്ടിംഗ് രീതികളില്‍ മാറ്റങ്ങള്‍ വരുത്തുന്ന ഒരു അന്താരാഷ്ട്ര മാനദണ്ഡം കമ്പനി അതിന്റെ സാമ്പത്തിക പ്രസ്താവനകള്‍ തയ്യാറാക്കുകയാണെങ്കില്‍, ധനകാര്യ പ്രസ്താവനകളില്‍ വ്യക്തമാക്കിയ നിരക്കുകള്‍ക്കനുസരിച്ച് മൂല്യത്തകര്‍ച്ച തുക കുറയ്ക്കാവുന്നതാണ്. എന്നാല്‍ ഓഡിറ്റ് സമയത്ത് ധനകാര്യ വകുപ്പ് ഇത് അംഗീകരിക്കുകയും ലാഭം കുറയ്ക്കുകയല്ല ഉദ്ദേശ്യമെന്ന് ഉറപ്പാക്കുകയും ചെയ്യണം.

2.b. തുടര്‍ന്നുള്ള നികുതി കാലയളവിലേക്കുള്ള നികുതി അടിസ്ഥാനം കണക്കാക്കുന്നതിനായി, നികുതി നഷ്ടങ്ങള്‍ നികുതി അടിസ്ഥാനത്തില്‍ നിന്ന് കുറയ്ക്കാവുന്നതാണ്. കൂടാതെ, നികുതി നഷ്ടങ്ങള്‍ ഭാവി കാലയളവുകളിലേക്ക് മാറ്റാവുന്നതാണ്.

ഷാര്‍ജയില്‍ കണ്‍സഷന്‍ അവകാശങ്ങളോ വാണിജ്യ ലൈസന്‍സോ പുതുക്കുന്നതിന് നികുതി അടയ്ക്കല്‍ നിര്‍ബന്ധമാണ്. ഈ നിയമപ്രകാരം നികുതിക്ക് വിധേയരായ കമ്പനികള്‍ ധനകാര്യ പ്രസ്താവനകളിലോ നികുതിയുമായി ബന്ധപ്പെട്ട മറ്റ് പ്രസ്താവനകളിലോ നല്‍കിയിരിക്കുന്ന വിവരങ്ങളുടെ കൃത്യതയ്ക്കായി ആ ധനകാര്യ പ്രസ്താവനകള്‍ പുറപ്പെടുവിച്ച തീയതി മുതല്‍ 7 വര്‍ഷത്തേക്ക് രേഖകളും അനുബന്ധ രേഖകളും സൂക്ഷിക്കേണ്ടതുണ്ട്.

നികുതി വെട്ടിപ്പ് നടത്തുന്നതിനായി കമ്പനി മനഃപൂര്‍വ്വം സാമ്പത്തിക ലംഘനങ്ങള്‍ നടത്തിയിട്ടുണ്ടെന്ന് എമിറേറ്റിന്റെ ധനകാര്യ വകുപ്പ് കണ്ടെത്തിയാല്‍, കമ്പനിക്ക് മൊത്തം നികുതി തുകയുടെ 5 ശതമാനം സാമ്പത്തിക പിഴ ചുമത്തും.