കോട്ടയം: കോട്ടയം ഗവ. നഴ്‌സിങ് കോളജിലെ റാഗിങ്ങില്‍ നടപടിയെടുത്ത് ആരോഗ്യ വകുപ്പ്. കോളജ് പ്രിന്‍സിപ്പലിനെയും, അസിസ്റ്റന്റ് വാര്‍ഡനെയും സസ്‌പെന്റ് ചെയ്തു. കോളജ് പ്രിന്‍സിപ്പല്‍ പ്രൊഫസര്‍. സുലേഖ എടി, അസിസ്റ്റന്റ് വാര്‍ഡന്‍, അജീഷ് പി മാണി എന്നിവരെയാണ് അന്വേഷണ വിധേയമായി സസ്‌പെന്റ് ചെയ്തത. മെഡിക്കല്‍ വിദ്യാഭ്യാസ വകുപ്പ് ഡയറക്ടര്‍ നടത്തിയ അന്വേഷണത്തിന്റെ പശ്ചാത്തലത്തിലാണ് നടപടി. 

സസ്‌പെന്‍ഷന് പുറമെ, ഹോസ്റ്റലിലെ ഹൗസ് കീപ്പിങ് കം സെക്യൂരിറ്റിയെ അടിയന്തരമായി പിരിച്ച് വിടാനും ഉത്തരവായി.  ഹോസ്റ്റലില്‍ നടന്ന റാഗിങ് തടയുന്നതില്‍ കോളജ് അധികൃതരുടെ ഭാഗത്ത് നിന്ന് വീഴ്ച്ചയുണ്ടായതായി കണ്ടെത്തിയിരുന്നു. 

തുടര്‍ച്ചയായി മൂന്ന് മാസത്തോളം റാഗിങ്ങിന് ഇരയായിട്ടും കോളജ് അധികൃതര്‍ ഇടപെട്ടില്ലെന്നാണ് കണ്ടെത്തല്‍. കോളജിന്റെ പ്രിന്‍സിപ്പല്‍ സുലേഖ തന്നെയാണ് ഹോസ്റ്റല്‍ വാര്‍ഡന്‍. അസിസ്റ്റന്റ് വാര്‍ഡന്റെ ചുമതലയാണ് പ്രൊഫസര്‍ അജീഷിനുള്ളത്. 

നേരത്തെ റാഗിങ് പരാതിയില്‍ അഞ്ച് വിദ്യാര്‍ഥികളെ പൊലിസ് അറസ്റ്റ് ചെയ്തിരുന്നു. കോട്ടയം സ്വദേശി സാമുവല്‍, വയനാട്  സ്വദേശി ജീവ, മലപ്പുറം സ്വദേശികളായ റിജില്‍ ജിത്ത്, രാഹുല്‍ രാജ്, കോട്ടയം സ്വദേശി വിവേക് എന്നിവരെയാണ് പൊലിസ് കസ്റ്റഡിയില്‍ എടുത്തത്. മൂന്നാം വര്‍ഷ വിദ്യാര്‍ഥികളായ അഞ്ചുപേരും ചേര്‍ന്ന് ഒന്നാം വര്‍ഷ വിദ്യാര്‍ഥികളെ മൂന്ന് മാസത്തോളം ക്രൂരമായ റാഗിങ്ങിന് ഇരയാക്കിയെന്നാണ് പരാതി. വിദ്യാര്‍ഥികളുടെ സ്വകാര്യ ഭാഗങ്ങളില്‍ ഡംബല്‍ തൂക്കിയിടുകയും, കോമ്പസ് കൊണ്ട് മുറിവേല്‍പ്പിച്ചെന്നും പരാതിയുണ്ട്.