അബൂദബി/ദുബൈ: എസ്എസ്എൽസി, ഹയർ സെക്കൻഡറി വിദ്യാർഥികൾക്ക് മോഡൽ പരീക്ഷ ഇന്നു മുതൽ ആരംഭിക്കും. യുഎഇയിലെ കേരള സിലബസ് വിദ്യാർഥികളും പരീക്ഷയിലേക്ക് കടക്കുകയാണ്. അതേസമയം, സിബിഎസ്ഇ 10, 11, 12 പരീക്ഷകൾ ശനിയാഴ്‌ച ആരംഭിച്ചിരുന്നു.

മോഡൽ പരീക്ഷ മാർച്ച് 3ന് ആരംഭിക്കുന്ന ബോർഡ് പരീക്ഷയ്ക്കുള്ള തയാറെടുപ്പ് നടത്തുന്ന വിദ്യാർഥികളുടെ ആത്മവിശ്വാസം വർധിപ്പിക്കും. മോഡൽ പരീക്ഷയുടെ മാതൃകയിലായിരിക്കും പൊതുപരീക്ഷ എന്നതിനാൽ ശേഷിച്ച ദിവസങ്ങളിൽ പോരായ്‌മകൾ പരിഹരിച്ച് ശുഭാപ്‌തിവിശ്വാസത്തോടെ പരീക്ഷ എഴുതാനുള്ള തയാറെടുപ്പിലാണ് വിദ്യാർഥികൾ.

ഇന്നു മുതൽ വ്യാഴം വരെ ദിവസേന രണ്ട് പരീക്ഷകളും വെള്ളിയാഴ്ച രാവിലെ മാത്രവുമാണ് പരീക്ഷ നിശ്ചയിച്ചിരിക്കുന്നത്. എസ്എസ്എൽസിക്കാർക്ക് രാവിലെ മലയാളം-1 പരീക്ഷയും ഉച്ചയ്ക്ക് മലയാളം-2 പരീക്ഷയുമാണ്. 

പ്ലസ് വണ്ണിന് മലയാളം/ഹിന്ദി/അറബിക്, ഉച്ചയ്ക്ക് ഇംഗ്ലിഷ് പരീക്ഷയുമാണ്. പ്ലസ് ടുവിന് രാവിലെ ഫിസിക്സും ഉച്ചയ്ക്ക് കംപ്യൂട്ടർ സയൻസ് പരീക്ഷയും നടക്കും. നാട്ടിലെ പരീക്ഷാ സമയത്തിന് ആനുപാതികമായി പ്ലസ് ടുവിന് രാവിലെ 8മണിക്കും എസ്എസ്എൽസിക്ക് 8.15നുമാണ് പരീക്ഷ ആരംഭിക്കുക. പരീക്ഷാഭവൻ തത്സമയം ഇമെയിൽ അയക്കുന്ന ചോദ്യപേപ്പർ അപ്പോൾ തന്നെ പ്രിന്റ് എടുത്ത് വിദ്യാർഥികൾക്ക് വിതരണം ചെയ്യും.

ഡിസംബറിൽ പാഠഭാഗങ്ങൾ തീർത്ത് ജനുവരി, ഫെബ്രുവരി മാസങ്ങളിൽ റിവിഷൻ ടെസ്റ്റുകൾ നടത്തിയും പോരായ്‌മകൾ പരിഹരിച്ചുമാണ് കുട്ടികളെ മോഡൽ പരീക്ഷക്ക് സജ്ജമാക്കുക. ഏതെങ്കിലും വിഷയം പ്രയാസമുള്ള വിദ്യാർഥികൾക്ക് അധ്യാപകർ ആ വിഷയങ്ങളിൽ പ്രത്യേക ക്ലാസുകളും നൽകിവരുന്നു. ഇവയെല്ലാം കഴിയുമ്പോൾ കുട്ടികൾക്കു ആത്മവിശ്വാസം കൈവരുകയും വാർഷിക പരീക്ഷയ്ക്ക് നല്ല മാർക്ക് നേടാൻ കഴിയുകയും ചെയ്യുമെന്ന് അധ്യാപകരും പറയുന്നു.

Kerala SSLC Model Exams Begin TSSLC Model Exams oday for Students in UAE