റിയാദ്: ബ്രസീലിയൻ സൂപ്പർതാരം കാസിമിറോ സഊദി ക്ലബ് അൽ നസറിലേക്ക് പോവുമെന്ന വാർത്തകൾ സജീവമായി നിലനിന്നിരുന്നു. ഇപ്പോൾ ഈ ട്രാൻസ്ഫാറിനെ സംബന്ധിച്ച് പുതിയ ഒരു റിപ്പോർട്ടാണ് പുറത്തുവന്നിരിക്കുന്നത്. ടോക്ക്സ്പോർട്ടിൻ്റെ റിപ്പോർട്ട് പ്രകാരം കാസിമിറോ മാഞ്ചസ്റ്റർ യുണൈറ്റഡിൽ തന്നെ തുടരാൻ തീരുമാനമെടുത്തുവെന്നാണ് പറയുന്നത്.

മാഞ്ചസ്റ്റർ യുണൈറ്റഡിനൊപ്പമുള്ള താരത്തിന്റെ കരാർ ഒരു വർഷം കൂടി നീട്ടാൻ സാധ്യതകൾ നിലനിൽക്കുന്നുണ്ട്. കഴിഞ്ഞ സീസണിൽ അത്ര മികച്ച പ്രകടനങ്ങൾ പുറത്തെടുക്കാൻ കാസിമിറോക്ക് സാധിച്ചിരുന്നില്ല. പല സമയങ്ങളിലും മാഞ്ചസ്റ്റർ യുണൈറ്റഡിന്റെ പ്ലെയിങ് ഇലവനിൽ കാസിമിറോക്ക് വേണ്ടത്ര അവസരങ്ങൾ ലഭിച്ചിരുന്നില്ല. 

ഈ ട്രാൻസ്ഫാർ നടക്കുകയെങ്കിൽ വീണ്ടും റൊണാൾഡോ-കാസിമിറോ കൂട്ടുകെട്ട് ഫുട്ബോൾ ആരാധകർക്ക് കാണാൻ സാധിക്കുമായിരുന്നു. റയൽ മാഡ്രിഡിന് വേണ്ടിയും മാഞ്ചസ്റ്റർ യുണൈറ്റഡിന് വേണ്ടിയും ഇരുവരും ഒരുമിച്ച് പന്തുതട്ടിയിട്ടുണ്ട്. റയലിനൊപ്പം ഒരുപിടി അവിസ്മരണീയമായ നിമിഷങ്ങൾ സൃഷ്ടിക്കാൻ റൊണാൾഡോക്കും കാസിമിറോക്കും സാധിച്ചിട്ടുണ്ട്. 122 മത്സരങ്ങളിലാണ് ഇരുവരും ഒരുമിച്ച് കളിച്ചിട്ടുള്ളത്. 

അതേസമയം 2022ലാണ് റൊണാൾഡോ മാഞ്ചസ്റ്റർ യുണൈറ്റഡിൽ നിന്നും അൽ നസറിലെത്തുന്നത്  റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. റൊണാൾഡോക്ക് പിന്നാലെ യൂറോപ്പിലെ വിവിധ ക്ലബ്ബുകളിലെ പ്രധാന താരങ്ങൾ ചേക്കേറിയിരുന്നു. കരിം ബെൻസിമ, നെയ്മർ, സാദിയോ മാനെ, റിയാദ് മെഹറസ്, റോബർട്ടോ ഫിർമീഞ്ഞോ തുടങ്ങിയ പ്രധാന താരങ്ങളും സഊദിയിലേക്ക് മാറിയിരുന്നു.