ന്യൂഡല്‍ഹി: പഹല്‍ഗാം ഭീകരാക്രമണം, ഓപറേഷന്‍ സിന്ദൂര്‍ മുതല്‍ യു.എസ് ഇടപെടല്‍ ഉള്‍പെടെ ചര്‍ച്ച ചെയ്യാന്‍ പ്രത്യേക പാര്‍ലമെന്റ് സമ്മേളനം വിളിക്കണമെന്ന് ആവശ്യപ്പെട്ട് പ്രതിപക്ഷം. ഇക്കാര്യം ആവശ്യപ്പെട്ട് ലോക്‌സഭ പ്രതിപക്ഷ നേതാവ് രാഹുല്‍ ഗാന്ധിയും രാജ്യസഭ പ്രതിപക്ഷ നേതാവ് മല്ലികാര്‍ജുന്‍ ഖാര്‍ഗെയും പ്രധാനമന്ത്രി നരേന്ദ്ര മോദിക്ക് കത്തയച്ചു. പ്രത്യേക പാര്‍ലമെന്റ് സമ്മേളനം വിളിക്കണമെന്നത് പ്രതിപക്ഷത്തിന്റെ ഒറ്റക്കെട്ടായുള്ള ആവശ്യമാണെന്നും കത്തില്‍ പറയുന്നു.

ഇന്ത്യ-പാക് വെടിനിര്‍ത്തലിലെ യുഎസ് മധ്യസ്ഥത, പഹല്‍ഗാം ഭീകരാക്രമണം, ഓപ്പറേഷന്‍ സിന്ദൂര്‍, വെടിനിര്‍ത്തല്‍ ധാരണ എന്നിവ ചര്‍ച്ച ചെയ്യണം. വെല്ലുവിളികളെ നേരിടുമെന്ന് കൂട്ടായ ദൃഢനിശ്ചയം പ്രകടിപ്പിക്കാനുള്ള അവസരമാണിത്. 1994 ലെ പാക് അധീന കാശ്മീര്‍ തിരിച്ച് പിടിക്കുമെന്ന പ്രമേയം ആവര്‍ത്തിക്കണം. ആവശ്യം പരിഗണിക്കുമെന്ന് വിശ്വസിക്കുന്നു- കത്തില്‍ പറയുന്നു.

ജനങ്ങളും അവരുടെ പ്രതിനിധികളും മുകളില്‍ സൂചിപ്പിച്ച കാര്യങ്ങള്‍ ചര്‍ച്ച ചെയ്യേണ്ടത് നിര്‍ണായകമാണെന്നും എന്ന് രാഹുല്‍ ഗാന്ധി കത്തില്‍ കുറിച്ചു. എല്ലാ വിഷയങ്ങളും കൃത്യമായി ചര്‍ച്ച ചെയ്യണം- കത്തില്‍ ആവര്‍ത്തിക്കുന്നു. 

ഇത് ഞങ്ങളുടെ വിഷയം അല്ലെന്നാണ് രണ്ട് ദിവസം മുന്‍പ് അമേരിക്ക പറഞ്ഞത്. അമേരിക്ക- ഇന്ത്യ ചര്‍ച്ച എങ്ങിനെയായിരുന്നു, എന്തെല്ലാം ചര്‍ച്ച ചെയ്തു എന്നത് ചര്‍ച്ച ചെയ്യണം. സര്‍ക്കാര്‍ എല്ലാവരെയും വിശ്വാസത്തില്‍ എടുക്കണമെന്നും കത്തില്‍ പറയുന്നു.

ഇന്ത്യ-പാക് വെടിനിര്‍ത്തലിലെ യുഎസ് മധ്യസ്ഥതയില്‍ ചോദ്യങ്ങള്‍ ഇന്ന് കോണ്‍ഗ്രസ് ഉയര്‍ത്തിയിരുന്നു.