അജ്‌മാൻ: റമദാനിൽ പണമടച്ചുള്ള പൊതു പാർക്കിങ്ങ് സമയം അടക്കം വിവിധ മേഖലകളിലെ പ്രവർത്തന സമയം പ്രഖ്യാപിച്ച് അജ്‌മാൻ മുനിസിപ്പാലിറ്റി. ശനി മുതൽ വ്യാഴം വരെയുള്ള ദിവസങ്ങളിൽ രാവിലെ 9 മുതൽ ഉച്ചയ്ക്ക് 1 വരെയും,  രാത്രി 8 മുതൽ അർധരാത്രി 12 വരെയും പാർക്കിങ് ഫീസ് അടക്കണം. അതേസമയം, ഉച്ചക്ക് ഒന്നിനും രാത്രി 8 നുമിടയിലുള്ള സമയം പാർക്കിങ്ങ് സൗജന്യമായിരിക്കും. റമദാനിൽ നഗരത്തിലുടനീളമുള്ള പൊതു പാർക്കുകളുടെ പ്രവർത്തി സമയവും അധികൃതർ പ്രഖ്യാപിച്ചു. വൈകിട്ട് 4 മുതൽ പിറ്റേന്ന് പുലർച്ചെ ഒന്നുവരെയാണ് പാർക്കുകളുടെ പ്രവർത്തി സമയം.

ഹാപ്പിനസ് സെൻ്ററുകളുടെ സമയം

ഹാപ്പിനസ് സെൻ്ററുകൾ തിങ്കളാഴ്ച മുതൽ വ്യാഴാഴ്ച വരെ രാവിലെ 9 മുതൽ ഉച്ചക്ക് 2.30 വരെയും വെള്ളിയാഴ്‌ചകളിൽ രാവിലെ 9 മുതൽ ഉച്ചക്ക് 12 വരെയും പ്രവർത്തിക്കും. പ്രധാന കസ്‌റ്റമർ ഹാപ്പിനെസ് സെന്റർ,  റെന്റൽ റെഗുലേഷൻ സെന്റർ, മനാമ സെൻ്റർ, മാസ്‌ഫൗത്ത് സെന്റർ എന്നിവക്ക് ഇത് ബാധകമാണ്.

കശാപ്പുശാലകൾ

സെൻട്രൽ സ്ലോട്ടർഹൗസ് എല്ലാ ദിവസവും രാവിലെ 9 മുതൽ ഉച്ചക്ക് 2.30 വരെ തുറന്നിരിക്കും. അതേസമയം, വെള്ളിയാഴ്ചകളിൽ രാവിലെ 9 മുതൽ 12 വരെയായിരിക്കും കശാപ്പുശാലകൾ പ്രവർത്തിക്കുക. മറ്റുള്ളവ ബുധനാഴ്ച മുതൽ വെള്ളിയാഴ്ച വരെ രാത്രി 8 മുതൽ 11.30 വരെ പ്രവർത്തിക്കും. അൽ മനാമ അറവുശാല ശനി മുതൽ വ്യാഴം വരെ രാവിലെ 8 മുതൽ ഉച്ചയ്ക്ക് 1.30 വരെ തുറക്കും. വെള്ളിയാഴ്‌ചകളിൽ രാവിലെ 8 മുതൽ 12 വരെ പ്രവർത്തിക്കും.

അതേസമയം, മസ്ഫൗത്ത് അറവുശാല ശനി മുതൽ വ്യാഴം വരെ രാവിലെ 9 മുതൽ വൈകിട്ട് 4 വരെ തുറന്നിരിക്കും. വെള്ളിയാഴ്ച രാവിലെ 9 മുതൽ 12 വരെയും ഉച്ചക്ക 2 മുതൽ 4 വരെയും പ്രവർത്തിക്കും.

സർക്കാർ ജീവനക്കാർക്ക് വെള്ളിയാഴ്‌ചകളിൽ വർക്ക് ഫ്രം ഹോം

റമദാനിലെ വെള്ളിയാഴ്ചകളിൽ അജ്‌മാനിലെ എല്ലാ സർക്കാർ ജീവനക്കാർക്കും വർക്ക് ഫ്രം ഹോം പ്രഖ്യാപിച്ചിരുന്നു. അതായത് വെള്ളിയാഴ്ചകളിൽ അവർക്ക് വീട്ടിലിരുന്ന് ജോലി ചെയ്യാം. റമദാനിലെ ഔദ്യോഗിക പ്രവൃത്തി സമയം തിങ്കൾ മുതൽ വ്യാഴം വരെ രാവിലെ 9 മുതൽ ഉച്ചക്ക് 2.30 വരെയും വെള്ളിയാഴ്‌ചകളിൽ രാത്രി 9 മുതൽ 12 വരെയും ആയിരിക്കും.

സ്‌കുളുകൾക്ക് റിമോട്ട് ലേണിങ് 

റമദാനിലെ വെള്ളിയാഴ്ചകളിൽ എമിറേറ്റിലെ സ്വകാര്യ സ്‌കൂളുകൾക്ക് റിമോട്ട് ലേണിങ് സ്വീകരിക്കാനുള്ള ഓപ്ഷൻ നൽകിയിട്ടുണ്ട്.

Ajman has announced the Ramadan timings for various sectors, including public parking, happiness centers, and more, to ensure a smooth and convenient experience for residents and visitors during the holy month.