മുംബൈ: ഐപിഎല്ലിലെ നിർണായക മത്സരത്തിൽ ഗുജറാത്ത് ടൈറ്റൻസും മുംബൈ ഇന്ത്യൻസും നേർക്കുനേർ ഏറ്റുമുട്ടുകയാണ്‌. മുംബൈയുടെ തട്ടകമായ വാംഖഡെ സ്റ്റേഡിയത്തിൽ നടക്കുന്ന മത്സരത്തിൽ ടോസ് നേടിയ ഗുജറാത്ത് ബൗളിംഗ് തെരഞ്ഞെടുക്കുകയായിരുന്നു. മത്സരത്തിൽ ആദ്യം ബാറ്റ് ചെയ്ത മുംബൈ 20 ഓവറിൽ എട്ട് വിക്കറ്റ് നഷ്ടത്തിൽ 155 റൺസാണ് നേടിയത്. 

ഗുജറാത്തിന്റെ ബൗളിങ്ങിൽ സായ് കിഷോർ രണ്ട് വിക്കറ്റുകളും മുഹമ്മദ് സിറാജ്, അർഷാദ് ഖാൻ, പ്രസീദ് കൃഷ്ണ, ജെറാൾഡ് കോറ്റ്സി, റഷീദ് ഖാൻ എന്നിവർ ഓരോ വിക്കറ്റ് വീതവും നേടിയപ്പോൾ മുംബൈ ബാറ്റിംഗ് നിര തകരുകയായിരുന്നു. 

മത്സരത്തിൽ ഫീൽഡിങ്ങിൽ ഒരുപാട് പിഴവുകളാണ് ഗുജറാത്ത്‌ വരുത്തിയത്. നാല് കാച്ചുകളാണ് ഗുജറാത്ത്‌ താരങ്ങൾ വിട്ടു കളഞ്ഞത്. ഈ സീസണിൽ ഏറ്റവും കൂടുതൽ ക്യാച്ചുകൾ കൈവിട്ടു കളഞ്ഞ ടീമുകളുടെ പട്ടികയിൽ രണ്ടാം സ്ഥാനമാണ് ഇതോടെ ഗുജറാത്തിന് ലഭിച്ചത്. ഇതിനോടകം തന്നെ 24 ക്യാച്ചുകളാണ്  ഗുജറാത്ത്‌ നഷ്ടപ്പെടുത്തിയത്. 25 ക്യാച്ചുകൾ കൈവിട്ട രാജസ്ഥാൻ റോയൽസ് ആണ് ഈ പട്ടികയിൽ ഒന്നാം സ്ഥാനത്തുള്ളത്. 21 ക്യാച്ചുകൾ നഷ്ടമാക്കിയ ചെന്നൈയാണ് പട്ടികയിൽ മൂന്നാം സ്ഥാനത്തുള്ളത്.

മത്സരത്തിൽ മുംബൈക്കായി വിൽ ജാക്സ് അർദ്ധ സെഞ്ച്വറി നേടി മികച്ച പ്രകടനമാണ് നടത്തിയത്. 35 പന്തിൽ അഞ്ചു ഫോറുകളും മൂന്ന് സിക്സുകളും ഉൾപ്പടെ 53 റൺസാണ് വിൽ ജാക്സ് നേടിയത്. സൂര്യകുമാർ യാദവ് 24 പന്തിൽ 34 റൺസും നേടി നിർണായകമായി. അഞ്ചു ഫോറുകളാണ് താരത്തിന്റെ ബാറ്റിൽ നിന്നും പിറന്നത്.

Gujarat Titans create a unwanted record in IPL 2025