കോഴിക്കോട്; വിചാരിച്ച ദിവസം അവധി ലഭിക്കാത്തതിന്റെ വിഷമത്തില്‍ പൊലിസ് സ്റ്റേഷനിലെ വാട്‌സ്ആപ്പ് ഗ്രൂപ്പില്‍ നാടക ഗാനം  പോസ്റ്റ് ചെയ്ത എസ്.ഐക്ക് സ്ഥലം മാറ്റം. എലത്തൂര്‍ സ്റ്റേഷനിലെ എസ്‌ഐയെ ആണ് ഫറോക്ക് സ്റ്റേഷനിലേക്ക് മാറിയത്. 

എലത്തൂര്‍ സ്റ്റേഷനിലെ വാട്‌സാപ്പ് ഗ്രൂപ്പിലായിരുന്നു 'പാമ്പുകള്‍ക്ക് മാളമുണ്ട്.. ' എന്ന പാട്ടിന്റെ ഓഡിയോ  എസ്‌ഐ പോസ്റ്റ് ചെയ്തത്. പരിഹാസ രൂപേണയായി പോസ്റ്റില്‍ നടപടിയെടുക്കുകയായിരുന്നു. 'ഈ പാട്ടിന് സ്റ്റേഷനിലെ സംഭവങ്ങളുമായി ബന്ധമില്ല' എന്നും എസ്‌ഐ ഗ്രൂപ്പില്‍ കുറിച്ചിരുന്നു.

അവധി ആവശ്യപ്പെട്ടിട്ടും മേല്‍ ഉദ്യോഗസ്ഥന്‍ അനുവദിച്ചില്ല എന്ന് ആരോപിച്ചായിരുന്ന എസ്‌ഐയുടെ പരിഹാസ രൂപത്തിലുള്ള പ്രതിഷേധത്തിന് പിന്നാലെയാണ് സംഭവത്തില്‍ മേലുദ്യോഗസ്ഥര്‍ നടപടിയെടുത്തത്. 

അതേസമയം, ആവശ്യത്തിന് അവധി നല്‍കിയില്ല എന്ന ആരോപണം മേല്‍ ഉദ്യോഗസ്ഥര്‍ നിഷേധിച്ചു. ഈ വര്‍ഷം ഇതുവരെ 20 ഓളം ദിവസങ്ങളില്‍ എസ്‌ഐ അവധി എടുത്തിട്ടുണ്ടെന്നാണ് മേല്‍ ഉദ്യോഗസ്ഥര്‍ നല്‍കുന്ന വിശദീകരണം.