ചെങ്ങന്നൂര്‍: ചെങ്ങന്നൂര്‍ സ്വദേശിയുടെ കളഞ്ഞുപോയ എടിഎം കാര്‍ഡ് ഉപയോഗിച്ച് പണം തട്ടിയ കേസില്‍ ബിജെപി വനിതാ നേതാവും, ഓട്ടോ ഡ്രൈവറും അറസ്റ്റില്‍. കാര്‍ഡുപയോഗിച്ച് മൂന്ന് എടിഎമ്മുകളില്‍ നിന്നായാണ് ഇരുവരും പണം തട്ടിയത്. സംഭവത്തില്‍ ബിജെപി നേതാവും ചെങ്ങന്നൂര്‍ ബ്ലോക്ക് പഞ്ചായത്ത് തിരുവന്‍ വണ്ടൂര്‍ ഡിവിഷന്‍ അംഗവുമായ സുജന്യ ഗോപി (42), കല്ലിശ്ശേരി വല്യത്ത് ലക്ഷ്മി നിവാസില്‍ സലിഷ് മോന്‍ (46) എന്നിവരാണ് പിടിയിലായത്. 

ചെങ്ങന്നൂര്‍ സ്വദേശിയായ വിനോദ് എബ്രഹാമാണ് പരാതിക്കാരന്‍. കഴിഞ്ഞ 14ാം തീയതി ഭാര്യയെ ജോലി സ്ഥലത്ത് കൊണ്ടുവിട്ടതിന് ശേഷം വീട്ടിലേക്ക് മടങ്ങുമ്പോഴാണ് വിനോദിന്റെ എടിഎം കാര്‍ഡ് അടങ്ങിയ പേഴ്‌സ് നഷ്ടമായത്. എടിഎം കാര്‍ഡിനോടൊപ്പം പിന്‍ നമ്പറും എഴുതി സൂക്ഷിച്ചിരുന്നു. ഇതാണ് പ്രതികള്‍ക്ക് സൗകര്യമൊരുക്കിയത്.

പ്രതികളിലൊരാളായ സലിഷ് മോന് ഓട്ടത്തിനിടയില്‍ എടിഎം കാര്‍ഡ് ലഭിച്ചു. ഇയാള്‍ ഉടന്‍ തന്നെ ബിജെപി നേതാവിനെ വിവരം അറിയിച്ചു. തുടര്‍ന്ന് ഇരുവരും കൂടി 15ാം തീയതി രാവിലെ ആറിനും എട്ടിനും ഇടയില്‍ ബുധനൂര്‍, പാണ്ടനാട്, മാന്നാര്‍ എന്നിവിടങ്ങളിലെ എടിഎം കൗണ്ടറുകളില്‍ നിന്നായി 25,000 രൂപ പിന്‍വലിച്ചു. 

അക്കൗണ്ടില്‍ നിന്ന് പണം പിന്‍വലിച്ച വിവരങ്ങള്‍ വിനോദിന്റെ ഫോണിലേക്ക് എസ്എംഎസായി ലഭിച്ചു. ഇതോടെയാണ് ചെങ്ങന്നൂര്‍ പൊലിസില്‍ പരാതി നല്‍കിയത്. അന്വേഷണത്തില്‍ നഷ്ടപ്പെട്ട പേഴ്‌സ് 16ാം തീയതി പുലര്‍ച്ചെ കല്ലിശ്ശേരി- ഓതറ റോഡിലെ റെയില്‍വേ മേല്‍പ്പാലത്തിന് സമീപത്ത് നിന്ന് കണ്ടെത്തി. 

തുടര്‍ന്ന് എടിഎം കൗണ്ടറുകളും, സമീപത്തെ കടകളിലെ സിസിടിവികളും കേന്ദ്രീകരിച്ച് നടത്തിയ പരിശോധനയിലാണ് പ്രതികളെ കുറിച്ചുള്ള നിര്‍ണായക വിവരങ്ങള്‍ ലഭിച്ചത്. ഇരുവരും ഒരുമിച്ച് സ്‌കൂട്ടറിലെത്തി പണം പിന്‍വലിക്കുന്ന ദൃശ്യങ്ങള്‍ പൊലിസ് കണ്ടെടുത്തു. സ്‌കൂട്ടര്‍ നമ്പര്‍ ഉപയോഗിച്ച് നടത്തിയ പരിശോധനയിലാണ് ബിജെപി നേതാവും, കൂട്ടാളിയും പിടിയിലായത്. 

police arrest bjp leader for thefting money using lost atm card in chengannoor