ജയ്പൂർ: 2025 ഐപിഎൽ പോരാട്ടങ്ങൾ ആരംഭിക്കാൻ ഇനി ദിവസങ്ങൾ മാത്രമേ ബാക്കിയുള്ളൂ. മാർച്ച് 22ന് നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സും റോയൽ ചലഞ്ചേഴ്‌സ് ബാംഗ്ലൂരും തമ്മിലുള്ള മത്സരത്തോട് കൂടിയാണ് ഇന്ത്യൻ ക്രിക്കറ്റ് മാമാങ്കത്തിന് തുടക്കമാവുന്നത്. മലയാളി സൂപ്പർ താരം സഞ്ജു സാംസണിന്റെ നേതൃത്വത്തിൽ രാജസ്ഥാൻ റോയൽസും കിരീട പോരാട്ടത്തിനായി തയ്യാറെടുത്തുകൊണ്ടിരിക്കുകയാണ്. രാജസ്ഥാൻ റോയൽസിന്റെ ആദ്യ മത്സരം മാർച്ച് 23നാണ് നടക്കുക. കഴിഞ്ഞ സീസണിലെ ഫൈനലിസ്റ്റുകളായ സൺറൈസേഴ്‌സ് ഹൈദെരാബാദാണ് രാജസ്ഥാന്റെ എതിരാളികൾ. 

പുതിയ സീസൺ തുടങ്ങുന്നതിനു മുന്നോടിയായി രാജസ്ഥാൻ റോയൽ നായകൻ സഞ്ജുവിന്റെ ക്യാപ്റ്റൻസിയെ പ്രശംസിച്ചുകൊണ്ട് സംസാരിച്ചിരിക്കുകയാണ് രാജസ്ഥാന്റെ വെസ്റ്റ് ഇൻഡീസ് താരം ഷിർമോൺ ഹെറ്റ്മെയർ. സഞ്ജു മികച്ച ക്യാപ്റ്റനാണെന്നും ഇന്ത്യയെ നയിക്കാനുള്ള അവസരം സഞ്ജുവിന് ലഭിക്കുമെന്നുമാണ് ഹെറ്റ്മെയർ പറഞ്ഞത്. 

"സഞ്ജുവിനെ ഒരു മികച്ച ക്യാപ്റ്റനെന്ന നിലയിലാണ് ഞാൻ വിലയിരുത്തുന്നത്. ടീമിൽ നന്നായി ശാന്തത പാലിക്കുകയും സഹതാരങ്ങൾക്കൊപ്പം മികച്ച രീതിയിൽ പ്രവർത്തിക്കാനും സഞ്ജുവിന് സാധിച്ചിട്ടുണ്ട്. എപ്പോഴെങ്കിലും ഇന്ത്യൻ ടീമിനെ നയിക്കാനുള്ള അവസരം സഞ്ജുവിന് ലഭിക്കുമെന്ന് ഞാൻ പ്രതീക്ഷിക്കുന്നു" ഷിർമോൺ ഹെറ്റ്മെയർ ക്രിക്കറ്റ് ഡോട്ട് കോമിന് നൽകിയ അഭിമുഖത്തിൽ പറഞ്ഞു. 

രാജസ്ഥാൻ റോയൽസ് ഈ സീസണിൽ നിലനിർത്തിയ എക വിദേശ താരമാണ് ഹെറ്റ്മെയർ. 11 കോടി രൂപക്കായിരുന്നു രാജസ്ഥാൻ വെസ്റ്റ് ഇൻഡീസ് താരത്തെ നിലനിർത്തിയിരുന്നത്. കഴിഞ്ഞ കുറച്ചു വർഷങ്ങളായി രാജസ്ഥാന് വേണ്ടി മികച്ച പ്രകടനമാണ് ഹെറ്റ്മെയർ നടത്തിക്കൊണ്ടിരിക്കുന്നത്. ഇത്തവണയും താരത്തിന്റെ ഭാഗത്ത് നിന്നും മികച്ച പ്രകടനം ഉണ്ടാകുമെന്നുതന്നെയാണ് ആരാധകർ ഉറച്ചുവിശ്വസിക്കുന്നത്.

അതേസമയം സഞ്ജു പരുക്കിൽ നിന്നും മുക്തി നേടിക്കൊണ്ട് രാജസ്ഥാന്റെ ക്യാമ്പിൽ എത്തിയിരിക്കുകയാണ്. ഇംഗ്ലണ്ടിനെതിരെയുള്ള ടി-20 പരമ്പരയിലെ അവസാന മത്സരത്തിലാണ് സഞ്ജുവിന് പരുക്ക് പറ്റിയിരുന്നത്. മത്സരത്തിൽ ബാറ്റ് ചെയ്യുന്നതിനിടെ സഞ്ജുവിന്റെ കൈവിരലിന് പൊട്ടലുണ്ടാവുകയായിരുന്നു. ഇതിനു പിന്നാലെ സഞ്ജു ആറ് ആഴ്ച്ചയോളം വിശ്രമത്തിലായിരുന്നു. ഇപ്പോൾ താരം ഫിറ്റ്നസ് വീണ്ടെടുത്തുകൊണ്ട് വീണ്ടും ടീമിലെത്തിയിരിക്കുന്നത് രാജസ്ഥാന് വലിയ ആശ്വാസമാണ് നൽകിയിരിക്കുന്നത്. 

2008ൽ ഐപിഎൽ കിരീടം നേടിയതിന് ശേഷം ഒരിക്കൽ പോലും രാജസ്ഥാന് ഇന്ത്യൻ ക്രിക്കറ്റിന്റെ നെറുകയിൽ എത്താൻ സാധിച്ചിട്ടില്ല. മൂന്ന് വർഷം മുമ്പത്തെ സീസണിൽ ഫൈനൽ വരെ മുന്നേറാൻ രാജസ്ഥാന് സാധിച്ചിരുന്നു. എന്നാൽ കലാശപ്പോരാട്ടത്തിൽ ഗുജറാത്ത് ജയന്റ്സിനോട് പരാജയപ്പെട്ട് സഞ്ജുവിനും സംഘത്തിനും കിരീടം നഷ്ടമാവുകയായിരുന്നു. അതുകൊണ്ട് തന്നെ നീണ്ട വർഷകാലത്തെ രാജസ്ഥാന്റെ കിരീട സ്വപ്നങ്ങൾ അവസാനിപ്പിക്കാനായിരിക്കും രാജസ്ഥാൻ കളത്തിൽ ഇറങ്ങുന്നത്. 

2025 ഐപിഎൽ രാജസ്ഥാൻ റോയൽസ് സ്‌ക്വാഡ്

സഞ്ജു സാംസൺ(ക്യാപ്റ്റൻ), യശസ്വി ജയ്‌സ്വാൾ, റിയാൻ പരാഗ്, ധ്രുവ് ജുറെൽ(വിക്കറ്റ് കീപ്പർ), ഷിംറോൺ ഹെറ്റ്‌മെയർ, സന്ദീപ് ശർമ, ജോഫ്ര ആർച്ചർ, മഹേഷ് തീക്ഷണ, വനിന്ദു ഹസരംഗ, ആകാശ് മധ്വാൾ, കുമാർ കാർത്തികേയ, നിതീഷ് റാണ, തുഷാർ ദേശ്പാണ്ഡെ, ശുഭം ദുബെ, യുധ്വിർ സിങ്, ഫസൽഹഖ് ഫാറൂഖി, വൈഭവ് സൂര്യവംശി, ക്വേന മഫാക, കുനാൽ റാത്തോഡ്, അശോക് ശർമ.

West Indies Player Shimron Hetmyer praises Sanju Samsons captaincy ahead of the start of the new IPL season