വെക്കേഷന്‍ തുടങ്ങാറായി. ഇനി യാത്രകളുടെ തിരക്കും ആരംഭിക്കും. എന്നാല്‍ ഈ സമയത്തെ തിരക്ക് 
ക്രമീകരിക്കാനും മുംബൈ മലയാളികള്‍ക്ക് എളുപ്പത്തില്‍ നാട്ടിലെത്താനും സമ്മര്‍ സ്‌പെഷല്‍ ട്രെയിന്‍ പ്രഖ്യാപിച്ച് റെയില്‍വേ. മുംബൈയിലെ ലോകമാന്യ തിലക് ടെര്‍മിനലില്‍ നിന്ന് ആരംഭിച്ച് തിരുവനന്തപുരം (കൊച്ചുവേളി) വരെയാണ് പ്രത്യേക തീവണ്ടി പ്രഖ്യാപിച്ചിരിക്കുന്നത്. 

ഏപ്രില്‍ 3 മുതല്‍ മെയ് 29 വരെ ആഴ്ചയില്‍ ഒരു ദിവസമാണ് സര്‍വീസ്. എല്ലാ വ്യാഴാഴ്ചയുമാണ് എല്‍ടിടിയില്‍ നിന്ന് വൈകുന്നേരം 4 മണിക്ക് ട്രെയിന്‍ പുറപ്പെടുക. വെള്ളിയാഴ്ച രാത്രി 10.45ന് തിരുവനന്തപുരം നോര്‍ത്തില്‍ എത്തും. ശനിയാഴ്ച 4.20ന് തിരുവനന്തപുരം നോര്‍ത്തില്‍ നിന്ന് ട്രെയിന്‍ എല്‍ടിടിയിലേക്ക് പുറപ്പെടും. തുടര്‍ന്ന് തിങ്കള്‍ പുലര്‍ച്ചെ 12.45ന് എല്‍ടിടിയിലെത്തും. മാര്‍ച്ച് 24 മുതല്‍ റിസര്‍വേഷന്‍ ആരംഭിക്കുന്നതാണ്. 

കേരളത്തില്‍ ട്രെയിനുകള്‍ക്ക് നിരവധി സ്റ്റോപ്പുകളുണ്ട്. കാസര്‍കോഡ്, കണ്ണൂര്‍, കോഴിക്കോട്, തിരൂര്‍, ഷോര്‍ണൂര്‍, എറണാകുളം ടൗണ്‍, കോട്ടയം, തിരുവല്ല, ചെങ്ങന്നൂര്‍, മാവേലിക്കര, കായംകുളം, കൊല്ലം എന്നിവിടങ്ങളിലാണ് സ്‌റ്റോപ്പുകള്‍ ഉള്ളത്.
കേരളത്തില്‍ നിന്ന് മുംബൈയിലേക്ക് മൂന്ന് സ്ഥിരം ട്രെയിനുകളാണ് ഉള്ളത്.

നേത്രാവതിയും എല്‍ടിടി വീക്കിലി, സിഎസ്എംടി എക്‌സ്പ്രസ് എന്നിവയാണവ. അവധിക്കാലത്ത് ഈ ട്രെയിനുകളില്‍ ടിക്കറ്റ് കിട്ടാന്‍ വളരെയധികം പ്രയാസമുള്ളതുകൊണ്ടാണ് റെയില്‍വേ പ്രത്യേക ട്രെയിന്‍ സര്‍വീസ് പ്രഖ്യാപിച്ചിരിക്കുന്നത്.