തിരുവനന്തപുരം: സെക്രട്ടറിയേറ്റിനു മുന്നിലെ സമരം ശക്തമാക്കാന്‍ ഒരുങ്ങി ആശാ വര്‍ക്കര്‍മാര്‍. ആശമാരുടെ കൂട്ട ഉപവാസം ഇന്നു മുതല്‍ ആരംഭിക്കുമെന്ന് നേരത്തേ അറിയിച്ചിരുന്നു. സമരപ്പന്തലില്‍ ഉപവാസം ഇരിക്കുന്ന ആശമാര്‍ക്ക് പിന്തുണ പ്രഖ്യാപിച്ചു കൊണ്ട് വീടുകളിലും ഉപവാസം ഇരിക്കുമെന്ന് ആശമാര്‍ അറിയിച്ചിട്ടുണ്ട്. നിലവില്‍ മൂന്നു പേര്‍ വീതമാണ് സെക്രട്ടറിയേറ്റിനു മുന്നിലെ സമരപ്പന്തലില്‍ ഉപവാസമിരിക്കുന്നത്. നിരാഹാര സമരം നടത്തുന്നവര്‍ക്ക് പിന്തുണയായിട്ടാകും മറ്റുള്ളവര്‍ ഉപവാസം ഇരിക്കുക.

ഓണറേറിയം വര്‍ധിപ്പിക്കണമെന്നതടക്കം നിരവധി ആവശ്യങ്ങളുമായി ആശാ പ്രവര്‍ത്തകര്‍ ആരംഭിച്ച രാപ്പകല്‍ സമരം നാല്‍പ്പത്തിമൂന്നാം ദിവസത്തിലേക്ക് കടന്നിരിക്കുകയാണ്. നിരാഹമിരുന്നിരുന്ന ആര്‍ ഷീജയെ ആരോഗ്യനില മോശമായതിനെ തുടര്‍ന്ന് ആശുപത്രിയിലേക്ക് മാറ്റിയിരുന്നു. 

അതേസമയം കേന്ദ്ര ആരോഗ്യമന്ത്രിയെ കാണാന്‍ അനുമതി തേടിയിട്ടുണ്ടെന്നും അനുമതി ലഭിച്ചാല്‍ കേന്ദ്ര ആരോഗ്യ മന്ത്രിയെ കാണുമെന്നും നിലവിലെ ആവശ്യങ്ങള്‍ ഉന്നയിക്കുമെന്നും ആരോഗ്യ മന്ത്രി വീണ ജോര്‍ജ് പറഞ്ഞു. 

ആശമാരുടെ സമരത്തില്‍ കേരളത്തിന് ഒന്നും ചെയ്യാനില്ലെന്ന് മുതിര്‍ന്ന സി.പി.എം നേതാവ് എകെ ബാലന്‍ പറഞ്ഞിരുന്നു. സംസ്ഥാനം ആശമാരുടെ സമരത്തിനും സമരക്കാര്‍ക്കും എതിരല്ലെന്നും ആശമാരുടെ സമരം പരിഹരിക്കേണ്ടത് കേന്ദ്രമാണെന്നുമാണ് എകെ ബാലന്‍ പറഞ്ഞത്.