കൃഷ്ണഗിരി: തമിഴ്നാട്ടിലെ കൃഷ്ണഗിരി ജില്ലയിൽ പാർട്ടിയുടെ കൊടിമരം നീക്കം ചെയ്യുന്നതിനിടെ വൈദ്യുതി ലൈനിൽ തട്ടി ഒരാൾക്ക് ദാരുണാന്ത്യം. ഉത്തർഗരായിൽ തിങ്കളാഴ്ച രാവിലെ ഡിഎംകെ പാർട്ടി പ്രവർത്തകർ കൊടിമരം നീക്കം ചെയ്യുന്നതിനിടെ അബദ്ധത്തിൽ വൈദ്യരിൽ തട്ടിയാണ് അപകടം ഉണ്ടായത്. 53 വയസ്സ് പ്രായമുള്ള കെ രാമ മൂർത്തിയാണ് മരിച്ചത്. സംഭവത്തിൽ നാല് പേർക്ക് പരുക്ക് സംഭവിക്കുകയും ചെയ്തു. 

തിങ്കളാഴ്ച രാവിലെയാണ് അഞ്ച് ഡിഎംകെ പ്രവർത്തകർ പ്രദേശത്ത് സ്ഥാപിച്ചിരുന്ന 20 അടിയോളം ഉയരമുള്ള കൊടിമരം നീക്കം ചെയ്യാൻ തുടങ്ങിയിടുന്നത്. എന്നാൽ ഇതിനിടെ വൈദ്യുതി കമ്പിയിൽ കൊടിമരം തട്ടിയാണ് അപകടം ഉണ്ടായത്. സംഭവത്തിന് പിന്നാലെ നാട്ടുകാർ സ്ഥലത്തെത്തുകയും പരുക്കേറ്റ ആളുകളെ ആശുപത്രിയിൽ എത്തിക്കുകയും ആയിരുന്നു. ആശുപത്രിയിൽ എത്തുന്നതിനു മുമ്പേ ഒരാൾ നേരത്തെ തന്നെ മരണപ്പെട്ടിരുന്നു. പരുക്കേറ്റ നാല് ആളുകളും ഗുരുതരാവസ്ഥയിൽ ആണുള്ളത്. സംഭവത്തിൽ പൊലിസ് കേസ് രജിസ്റ്റർ ചെയ്തിട്ടുണ്ട്.

ദേശീയപാതകൾക്ക് അടുത്തുള്ള പാർട്ടി കൊടിമരങ്ങൾ നീക്കം ചെയ്യണമെന്ന് മദ്രാസ് കോടതി അടുത്തിടെ സംസ്ഥാന സർക്കാരിനോട് ആവശ്യപ്പെട്ടിരുന്നു. ഇതോടെയാണ് പാർട്ടിയുടെ എല്ലാ കൊടിമരങ്ങളും വേഗത്തിൽ നീക്കം ചെയ്യണമെന്ന നിർദ്ദേശം പ്രവർത്തകർക്ക് ലഭിച്ചത്. ഡിഎംകെ ജനറൽ സെക്രട്ടറി ദുരൈ മുരുകൻ ആണ് പാർട്ടി പ്രവർത്തകർക്ക് നിർദ്ദേശം നൽകിയിരുന്നത്.

Accident while removing party flagpole in Tamil Nadu; One dead, four injured