തിരുവനന്തപുരം: ആശ്രിത നിയമന വ്യവസ്ഥകളിൽ സമ​ഗ്ര മാറ്റത്തിനൊരുങ്ങി കേരളം. പുതിയ തീരുമാനമനുസരിച്ച് സംസ്ഥാന സർവീസിൽ ഇരിക്കെ മരിക്കുന്ന എല്ലാ ജീവനക്കാരുടെയും ആശ്രിതർക്ക് ജോലിക്ക് അർഹത ഉണ്ടായിരിക്കും. ജീവനക്കാരൻ മരണമടയുന്ന സാഹചര്യം പരി​ഗണിക്കാതെ തന്നെ നിയമനം നൽകാനാണ് തീരുമാനം. പരിഷ്കരിച്ച നിയമന വ്യവസ്ഥകൾക്ക് മന്തിസഭാ അം​ഗീകാരം നൽകി. 

13 വയസോ അതിന് മുകളിലോ പ്രായമുള്ള ആശ്രിതർക്കാണ് നിയമനത്തിന് അർഹത. അവിവാഹിതരായ ജീവനക്കാരനാണെങ്കിൽ അച്ഛൻ, അമ്മ, അവിവാഹിതരായ സഹോദരി, സഹോദരൻ എന്നിങ്ങനെയാണ് മുൻഗണനാ ക്രമത്തിലൂടെ നിയമനം നടക്കുക. ആശ്രിതർ തമ്മിൽ അഭിപ്രായ സമന്വയമുണ്ടെങ്കിൽ അപ്രകാരവും അല്ലാത്ത പക്ഷം മുൻഗണനാ ക്രമത്തിലുമായിരിക്കും നിയമനം. ആശ്രിത നിയമന അപേക്ഷകളില‍െ കാലതാമസം പരിഹരിക്കുകയെന്ന ലക്ഷ്യവും പുതിയ തീരുമാനത്തിന് പുറകിലുണ്ട്. 

സർക്കാർ വിദ്യാഭ്യാസ സ്ഥാപനങ്ങളിലെ (കോളജുകളിലെ പ്രിൻസിപ്പൽമാർ ഉൾപ്പെടെ) അധ്യാപകരുടെ ആശ്രിതർക്കും നിയമനത്തിന് അർഹതയുണ്ടായിരിക്കും. എന്നാൽ ഈ ആനുകൂല്യം എയ്ഡഡ് സ്ഥാപനങ്ങൾക്ക് ബാധകമല്ല. ഉപാധികൾ അനുസരിച്ച് നിലവിൽ എയ്ഡഡ് സ്ഥാപനങ്ങളിൽ നടക്കുന്ന ആശ്രിത നിയമനങ്ങൾ നടക്കുന്നുണ്ടെങ്കിലും പുതിയ തീരുമാനത്തിൽ ഇത് ഉൾപ്പെടുത്തിയിട്ടില്ല. 

അതേസമയം ഇൻവാലിഡ് പെൻഷണർ ആയ ജീവനക്കാർ മരണപ്പെട്ടാൽ ആശ്രിതർക്ക് നിയമനം ലഭിക്കില്ല. മാത്രമല്ല സർവീസ് നീട്ടിക്കൊടുക്കൽ വഴിയോ,  പുനർനിയമനം മുഖേനയോ സർവീസിൽ തുടരാൻ അനുമതി ലഭിക്കുകയും, ഈ കാലയളവിൽ മരണപ്പെടുകയും ചെയ്ത ജീവനക്കാരുടെ ആശ്രിതർക്കും ജോലിക്ക് അർ​ഹതയുണ്ടായിരിക്കില്ലെന്നും പുതിയ നിയമത്തിൽ വ്യവസ്ഥയുണ്ട്. മാത്രമല്ല സ്വമേധയാ വിരമിച്ച ജീവനക്കാർ മരണപ്പെട്ടാലും അവരുടെ ആശ്രിതർക്ക് നിയമനത്തിന് അർ​ഹതയുണ്ടായിരിക്കില്ലെന്നും വ്യവസ്ഥയുണ്ട്. 

kerala cabinet meeting approves new revision in compassionate appointment