കൊച്ചി: നടിയെ ആക്രമിച്ച കേസില്‍ സിബിഐ അന്വേഷണം ആവശ്യപ്പെട്ട് ദിലീപ് നല്‍കിയ ഹരജി തള്ളി ഹൈക്കോടതി. വിചാരണ അവസാനഘട്ടത്തില്‍ എന്നു വിലയിരുത്തിയാണ് ഹൈക്കോടതിയുടെ നടപടി. ദിലീപ് നാലുവര്‍ഷം മുമ്പായിരുന്നു ഹൈകോടതിയില്‍ ഹരജി നല്‍കിയത്. ഈ ഹരജിയാണ് ഇപ്പോള്‍  കോടതി തള്ളിയത്. എട്ടാം പ്രതിയാണ് കേസില്‍ ദിലീപ്. മുഖ്യപ്രതി പള്‍സര്‍ സുനി 7 വര്‍ഷത്തെ ജയില്‍വാസത്തിനു ശേഷമാണ് അടുത്തിടെ ജാമ്യത്തില്‍ പുറത്തിറങ്ങിയത്. 

കേസില്‍ രണ്ട് ഫൊറന്‍സിക് വിദഗ്ധരെ വീണ്ടും വിസ്തരിക്കുമെന്ന പ്രതി പള്‍സര്‍ സുനിയുടെ ആവശ്യം ഹൈകോടതി തളളുകയും ചെയ്തിരുന്നു. സുനിയുടേത് ബാലിശമായ വാദമായതിനാലാണ് ഹൈകോടതി തള്ളിയത്. സാക്ഷികളെ വീണ്ടും വിസ്തരിക്കല്‍ അനിവാര്യമായ നടപടിയല്ലെന്നും പറഞ്ഞ കോടതി സാക്ഷികളെ വീണ്ടും വിസ്തരിക്കുന്നത് കേസിന്റെ വിചാരണ വീണ്ടും വൈകാന്‍ ഇടയാക്കുമെന്നും ഉത്തരവില്‍ പറയുന്നു.

പ്രോസിക്യൂഷന്‍ സാക്ഷികളെ കാരണമില്ലാതെ വീണ്ടും വിസ്തരിക്കുന്നതിന് ചട്ടമില്ലെന്നും കോടതി. 2017 ഫെബ്രുവരിയിലാണ് കൊച്ചിയില്‍ ഓടിക്കൊണ്ടിരിക്കുന്ന വാഹനത്തില്‍ നടി അതിക്രൂരമായി ആക്രമിക്കപ്പെടുന്നത്. നടന്‍ ദിലീപ് ഉള്‍പ്പെടെ ഒമ്പത് പേരായിരുന്നു കേസിലെ പ്രതികള്‍. രണ്ടുപേരെ നേരത്തെ പ്രതിപ്പട്ടികയില്‍ നിന്ന് ഒഴിവാക്കുകയും ഒരാള്‍ മാപ്പുസാക്ഷിയുമായിരുന്നു. ഒന്നാം പ്രതിയായ പള്‍സര്‍ സുനിക്ക് ഏഴരവര്‍ഷത്തിനു ശേഷം കഴിഞ്ഞദിവസം സുപ്രീം കോടതി ജാമ്യവും അനുവദിച്ചിരുന്നു.