ഗുജറാത്ത് ടൈറ്റൻസിന്റെ സ്റ്റാർ ഓൾ റൗണ്ടർ ഗ്ലെൻ ഫിലിപ്സ് നാട്ടിലേക്ക് മടങ്ങി. പരുക്കേറ്റതിന് പിന്നാലെയാണ് താരം ന്യൂസിലാൻഡിലേക്ക് മടങ്ങിയത്. ഏപ്രിൽ ആറിന് സൺറൈസ് ഹൈദരാബാദിനെതിരെയുള്ള മത്സരത്തിൽ ആയിരുന്നു ഫിലിപ്പിന് പരുക്ക് സംഭവിച്ചിരുന്നത്. മത്സരത്തിൽ പകരക്കാരനായി ഇറങ്ങി ഫീൽഡ് ചെയ്യുന്നതിനിടയായിരുന്നു താരത്തിന് പരുക്ക് സംഭവിച്ചത്. ഐപിഎല്ലിലെ ശേഷിക്കുന്ന മത്സരങ്ങൾ താരത്തിന് നഷ്ടമാവും. 

ഈ സീസണിൽ ശക്തമായ മുന്നേറ്റമാണ് ഗുജറാത്ത് ടൈറ്റൻസ് നടത്തിക്കൊണ്ടിരിക്കുന്നത്.സീസണിലെ ആദ്യ മത്സരത്തിൽ പഞ്ചാബ് കിങ്‌സിനോട് പരാജയപ്പെട്ട ഗുജറാത്ത് പിന്നീട് ടൂർണ്ണമെന്റിലേക്ക് ശക്തമായി തിരിച്ചു വരികയായിരുന്നു. തുടർച്ചയായി നാല് മത്സരങ്ങളും വിജയിച്ചുകൊണ്ടാണ് ശുഭ്മൻ ഗില്ലും സംഘവും തിരിച്ചു വന്നത്. നിലവിൽ എട്ട് പോയിന്റുമായി ഒന്നാം സ്ഥാനത്താണ് ഗുജറാത്ത് ടൈറ്റൻസ്. അവസാന മത്സരത്തിൽ രാജസ്ഥാൻ റോയൽസിനെയാണ് ഗുജറാത്ത് വീഴ്ത്തിയത്. 

ഗുജറാത്ത് 58 റൺസിനാണ് രാജസ്ഥാനെ പരാജയപ്പെട്ടത്. സീസണിലെ രാജസ്ഥാന്റെ മൂന്നാം തോൽവിയായിരുന്നു ഇത്. ഗുജറാത്തിന്റെ തട്ടകമായ അഹമ്മദാബാദ് നരേന്ദ്ര മോദി സ്റ്റേഡിയത്തിൽ നടന്ന മത്സരത്തിൽ ടോസ് നേടിയ രാജസ്ഥാൻ റോയൽസ് നായകൻ സഞ്ജു സാംസൺ ബൗളിങ് തെരഞ്ഞെടുക്കുകയായിരുന്നു. മത്സരത്തിൽ ആദ്യം ബാറ്റ് ചെയ്ത ഗുജറാത്ത് 20 ഓവറിൽ ആറു വിക്കറ്റ് നഷ്ടത്തിൽ 217 റൺസാണ് അടിച്ചെടുത്തത്. വിജയലക്ഷ്യം പിന്തുടർന്നിറങ്ങിയ രാജസ്ഥാൻ 19.2 ഓവറിൽ 159 റൺസിന് പുറത്താവുകയായിരുന്നു.

മത്സരത്തിൽ ഗുജറാത്തിനു വേണ്ടി പ്രസിദ് കൃഷ്ണ മൂന്ന് വിക്കറ്റുകളും റാഷിദ് ഖാൻ, സായ് കിഷോർ എന്നിവർ രണ്ട് വീതം വിക്കറ്റുകളും നേടി മിന്നും പ്രകടനം നടത്തിയപ്പോൾ രാജസ്ഥാൻ ബാറ്റിംഗ് തകരുകയായിരുന്നു. കുൽവന്ദ് കെജ്രോലിയ, മുഹമ്മദ്‌ സിറാജ്, അർഷദ് ഖാൻ എന്നിവർ ഓരോ വീതം വിക്കറ്റുകളും നേടി. 

Gujarat Titans New Zealand star all rounder Glenn Phillips ruled out of IPL due to injury