പാട്‌ന: ബിഹാറില്‍ മൂന്ന് ദിവസത്തിനുള്ളില്‍ ഇടിമിന്നലേറ്റ് മരിച്ചത് 80 പേര്‍. കഴിഞ്ഞ രണ്ട് ദിവസത്തിനുള്ളില്‍ മാത്രം 66 പേരാണ് ഇടിമിന്നലേറ്റ് മരിച്ചത്. നാലന്ത ജില്ലയില്‍ 23 പേരുടെ മരണം രേഖപ്പെടുത്തിയിട്ടുണ്ട്. ഭോജ്പൂര്‍, സിവാന്‍, ഗയ, പാട്‌ന, ശേഖ്പുര, ജഹാനാബാദ്, ഗോപാല്‍ഗഞ്ച്, മുസഫര്‍പൂര്‍, അര്‍വാള്‍, നവാദ, ഭാഗല്‍പൂര്‍ എന്നീ ജില്ലകളിലും മരണങ്ങള്‍ റിപ്പോര്‍ട്ട് ചെയ്തിട്ടുണ്ട്. ഇതിനുമുന്‍പ് 2020 ജൂണില്‍ 90 പേര്‍ ഇടിമിന്നലേറ്റ് മരിച്ച സംഭവമുണ്ടായിരുന്നു. കഴിഞ്ഞ നാല് വര്‍ഷത്തിനുള്ളില്‍ ഇത് രണ്ടാം തവണയാണ് ഇത്രയധികം മരണങ്ങള്‍ രേഖപ്പെടുത്തുന്നത്.

കാലാവസ്ഥാ വ്യതിയാനവും ജനങ്ങളുടെ അശ്രദ്ധയുമാണ് മരണസംഖ്യ വര്‍ധിക്കാന്‍ കാരണമെന്നാണ് അധികൃതര്‍ പറയുന്നത്. തുറന്ന സ്ഥലങ്ങളില്‍ പണിയെടുക്കുന്ന കര്‍ഷകര്‍ക്കും മറ്റ് തൊഴിലാളികള്‍ക്കും ഇടിമിന്നല്‍ ഏല്‍ക്കാനുള്ള സാധ്യത കൂടുതലാണ്. മുന്നറിയിപ്പുകള്‍ അവഗണിക്കുന്നതാണ് മരണസംഘ്യ ഉയരാന്‍ കാരണമെന്നും അധികൃതര്‍ പറയുന്നു. 

കാലാവസ്ഥാ വിദഗ്ദ്ധന്‍ ആശിഷ് കുമാര്‍ പറയുന്നത് പ്രകാരം, താപനിലയിലുണ്ടായ വര്‍ധനവാണ് മരണസംഘ്യ ഉയരാന്‍ കാരണം. 'വടക്ക്പടിഞ്ഞാറന്‍ വരണ്ട കാറ്റും ബംഗാള്‍ ഉള്‍ക്കടലിലെ ഈര്‍പ്പം നിറഞ്ഞ കാറ്റും കൂടിച്ചേരുന്നത് മേഘങ്ങളുടെ രൂപീകരണത്തിനും ഇടിമിന്നല്‍ ഉണ്ടാകാനും കാരണമാകുന്നു.' എന്ന് അദ്ദേഹം വ്യക്തമാക്കി. ബിഹാറിലെ സമതല പ്രദേശങ്ങള്‍ ഇത്തരം സംഭവങ്ങള്‍ക്ക് ഏറ്റവും സാധ്യതയുള്ള മേഖലയാണൈന്നും ആശിഷ് കുമാര്‍ ചൂണ്ടിക്കാട്ടി.

At least 80 people have died due to lightning strikes in Bihar over three days, with 66 fatalities occurring in just the last 48 hours. Nalanda district alone reported 23 deaths. Authorities warn of increasing extreme weather risks as climate patterns shift, urging public caution during monsoon season.