മൂന്നാര്‍: പ്രായപൂര്‍ത്തിയാകാത്ത കുട്ടികളെ ലൈംഗികമായി പീഡിപ്പിച്ച കേസില്‍ ഒളിവിലായിരുന്ന പാസ്റ്റര്‍ ജോണ്‍ ജെബരാജ് അറസ്റ്റില്‍. മൂന്നാറില്‍ വച്ചാണ് കോയമ്പത്തൂര്‍ പൊലിസ് ഇയാളെ അറസ്റ്റ് ചെയ്തത്. 

കുട്ടികളെ പീഡിപ്പിച്ച സംഭവത്തില്‍ തമിഴ്‌നാട് പൊലിസ് ജെബരാജിനെതിരെ പോക്‌സോ കേസ് രജിസ്റ്റര്‍ ചെയ്തിരുന്നു.

പ്രായപൂര്‍ത്തിയാകാത്ത രണ്ടു കുട്ടികളെ ലൈംഗികമായി പീഡിപ്പിച്ചു എന്നാണ് ജോണ്‍ ജെബരാജിനെതിരായ കേസ്. കഴിഞ്ഞവര്‍ഷം മേയില്‍ ഇയാളുടെ വീട്ടില്‍ വച്ച് നടന്ന ഒരു പാര്‍ട്ടിക്കിടയില്‍ വെച്ചാണ് ഇയാള്‍ കുട്ടികളെ പീഡിപ്പിച്ചത്. 

കുട്ടികളില്‍ ഒരാള്‍ ബന്ധുവിനോട് ഇക്കാര്യം തുറന്നു പറഞ്ഞതോടുകൂടിയാണ് സംഭവം വെളിപ്പെടുന്നത്. തുടര്‍ന്ന് കുട്ടിയുടെ പരാതിയില്‍ കോയമ്പത്തൂര്‍ സെന്‍ട്രല്‍ ഓള്‍ വിമന്‍സ് പൊലിസ് സ്റ്റേഷനില്‍ പരാതി നല്‍കുകയായിരുന്നു. മദ്രാസ് ഹൈക്കോടതിയില്‍ ഇയാള്‍ മുന്‍കൂര്‍ ജാമ്യ നല്‍കിയിരുന്നു. പക്ഷേ കോടതി ഇയാളുടെ ഹര്‍ജി തള്ളി.

കോയമ്പത്തൂര്‍ ആസ്ഥാനമായി കിംഗ്‌സ് ജനറേഷന്‍സ് ചര്‍ച്ച് എന്ന പേരില്‍ പ്രവര്‍ത്തിച്ചുവരികയായിരുന്നു ഇയാള്‍. കോടതിയില്‍ ഹാജരാക്കിയ ശേഷം ഇയാളെ ജുഡീഷ്യല്‍ കസ്റ്റഡിയില്‍ വിട്ടു. ജോണ്‍ ജെബരാജിനെ അറസ്റ്റ് ചെയ്യാന്‍ കോയമ്പത്തൂര്‍ പൊലിസ് ഒന്നിലധികം സംഘങ്ങളെ നിയോഗിച്ചിരുന്നു.