മുസഫര്‍നഗര്‍: യുപിയില്‍ മുസ്‌ലിും യുവതിയുടെ ഹിജാബ് ബലമായി അഴിച്ച്മാറ്റുകയും, കൂടെയുണ്ടായിരുന്ന പുരുഷനെ ആക്രമിക്കുകയും ചെയ്ത കേസില്‍ ആറുപേര്‍ അറസ്റ്റില്‍. ഖലാപര്‍ നിവാസിയായ ഫര്‍ഹീനും, സച്ചിനും നേരെയാണ് ആക്രമണമുണ്ടായത്. 

കഴിഞ്ഞ ഏപ്രില്‍ 12ന് മുസഫര്‍ നഗറില്‍ വെച്ചാണ് യുവതിക്ക് നേരേ ആക്രമണമുണ്ടായത്. ഉത്കര്‍ഷ് സ്‌മോള്‍ ഫിനാന്‍സ് ബാങ്ക് ജീവനക്കാരനും, ഖലാപ്പറില്‍ നിന്നുള്ള മുസ്‌ലിം യുവതിയും വായ്പ ഗഡു വാങ്ങിയ ശേഷം മോട്ടോര്‍ സൈക്കിളില്‍ മടങ്ങുമ്പോഴാണ് ആക്രമണമുണ്ടായത്.

എട്ട് പത്ത് പേരടങ്ങുന്ന സംഘം തങ്ങളെ തടഞ്ഞ് നിര്‍ത്തി ആക്രമിക്കുകയായിരുന്നെന്ന് യുവതി പറഞ്ഞു. സ്വയം രക്ഷപ്പെടാന്‍ ശ്രമിക്കുന്നതിനിടെ പ്രതികളിലൊരാള്‍ തന്റെ ബുര്‍ഖയും, വസ്ത്രങ്ങളും വലിച്ച് കീറി. മാത്രമല്ല തന്റെ കൂടെയുണ്ടായിരുന്ന ആളെ മര്‍ദ്ദിക്കുകയും, സംഭവത്തിന്റെ ദൃശ്യങ്ങള്‍ പകര്‍ത്തി വൈറലാക്കുമെന്ന് പറഞ്ഞ് ഭീഷണിപ്പെടുത്തിയെന്നും യുവതി പറഞ്ഞു. 

തുടര്‍ന്ന് പൊലിസെത്തിയാണ് ഇരുവരെയും സംഭവ സ്ഥലത്ത് നിന്നും രക്ഷപ്പെടുത്തിയത്. ഫര്‍ഹീന്റെ പരാതിയില്‍ ഭാരതീയ ന്യായസംഹിത 115 (2), 352, 191 (2), 74 വകുപ്പുകള്‍ ചേര്‍ത്ത് പൊലിസ് കേസ് രജിസ്റ്റര്‍ ചെയ്തു. നിലവില്‍ ആറുപേരെയാണ് കസ്റ്റഡിയില്‍ എടുത്തിട്ടുള്ളത്. സംഭവത്തിന്റെ വീഡിയോ ദൃശ്യങ്ങള്‍ കൂടെയുണ്ടായിരുന്ന മറ്റൊരാള്‍ പകര്‍ത്തുകയും, സോഷ്യല്‍ മീഡിയയില്‍ ഷെയര്‍ ചെയ്യുകയും ചെയ്തിട്ടുണ്ട്. ഇത് പരിശോധിച്ച് കണ്ടാല്‍ അറിയുന്ന മുഴുവന്‍ പ്രതികളെയും പിടികൂടുമെന്ന് മുസാഫര്‍ നഗര്‍ സിറ്റി ഡിഎസ് പി രാജുകുമാര്‍ പറഞ്ഞു.

Uttar Pradesh police arrested 6 people for attacking a Muslim women in Muzaffarnagr and torn her burqa