പാലക്കാട്: ചെര്‍പ്പുളശ്ശേരിയില്‍ ചായക്കടയിലേക്ക് പിക്കപ്പ് വാന്‍ ഇടിച്ചു കയറി യുവാവ് മരണപ്പെട്ടു. നാലു പേര്‍ക്ക് പരിക്കേല്‍ക്കുകയും ചെയ്തു. മലപ്പുറം തിരൂര്‍ സ്വദേശി വി. തഹ്‌സീല്‍ (20) ആണ് മരിച്ചത്. കോഴികളുമായി വന്ന പിക്കപ്പ് വാന്‍ നിയന്ത്രണം വിടുകയും യുവാക്കള്‍ക്കിടയിലേക്ക് ഇടിച്ചുകയറുകയുമായിരുന്നു. ഇന്ന് പുലര്‍ച്ചെ രണ്ടുമണിയോടെയാണ് സംഭവം നടന്നത്. 

കൊടൈക്കനാലിലേക്ക് യാത്ര പോവുകയായിരുന്ന യുവാക്കള്‍ ചായ കുടിക്കുന്നതിന് വേണ്ടി വാഹനം നിര്‍ത്തിയതായിരുന്നു. വഴിയരികില്‍ നില്‍ക്കുന്ന സമയത്താണ് കോഴിയുമായി വന്ന പിക്കപ്പ് വാന്‍ നിയന്ത്രണം വിട്ട് ഇടിച്ചുകയറുന്നത്. അഞ്ച് യുവാക്കള്‍ക്കും ഗുരുതരമായി പരിക്കേല്‍ക്കുകയും ചെയ്തു. ഉടന്‍ തന്നെ നാട്ടുകാര്‍ ആശുപത്രിയിലെത്തിച്ചെങ്കിലും തഹ്‌സീല്‍ മരിച്ചിരുന്നു. പരിക്കേറ്റ നാലുപേരും ചികിത്സയില്‍ തുടരുകയാണ്. പിക്കപ്പ് വാനിന്റെ ഡ്രൈവര്‍ക്കെതിരെ പൊലിസ് കേസെടുക്കും.