ആലപ്പുഴ: എഴുപുന്നയിലെ ശ്രീനാരായണപുരം ശ്രീ മഹാവിഷ്ണു ക്ഷേത്രത്തിലെ തിരുവാഭരണങ്ങൾ മോഷണം പോയ കേസിൽ കീഴ്ശാന്തി പിടിയിലായി. കൊല്ലം സ്വദേശിയായ രാമചന്ദ്രൻ പോറ്റിയാണ് സംഭവത്തിൽ പിടിയിലായത്. എറണാംകുളത്ത് വെച്ചായിരുന്നു ഇയാൾ പിടിയിൽ ആയത്. കിരീടം അടക്കം 20 പവൻ സ്വർണമാണ് ഇയാൾ മോഷ്ടിച്ചത്. രണ്ട് നെക്ലേസ്, വലിയ മാല, കിരീടം എന്നിവയാണ് നഷ്ടമായത്. 

മേൽശാന്തി അവധി ആയതിനാൽ വിഷുവിന്റെ തലേദിവസം ആറ് മണിയോടെ വിഗ്രഹത്തിൽ ചാർത്താനുള്ള ആഭരണങ്ങൾ ക്ഷേത്രം ഭാരവാഹികൾ കീഴ്ശാന്തിയായ രാമചന്ദ്രൻ പോറ്റിയെ ഏൽപ്പിക്കുകയായിരുന്നു.

എന്നാൽ പൂജകൾക്ക് ശേഷം ആഭരണങ്ങൾ ഇയാൾ തിരിച്ചു നൽകാതിരിക്കുകയായിരുന്നു. പല തവണ ഇതിനെക്കുറിച്ച് ചോദിക്കുമ്പോൾ ഉടൻ തിരിച്ചു നൽകാമെന്നാണ് ഇയാൾ പറഞ്ഞതെന്നാണ് ക്ഷേത്രം ഭാരവാഹികൾ പറഞ്ഞത്. പരാതിയിൽ അരൂർ പൊലിസ് കേസ് എടുത്തു.