തിരുവനന്തപുരം: ഇംഗ്ലീഷ് മീഡിയം ഉൾപ്പെടെയുള്ള സ്‌കൂൾ പാഠപുസ്തകങ്ങൾക്ക് ഹിന്ദി പേരുകൾ നൽകാനുള്ള നാഷണൽ കൗൺസിൽ ഓഫ് എഡ്യൂക്കേഷണൽ റിസർച്ച് ആൻഡ് ട്രെയിനിങ്ങിന്റെ (എൻസിഇആർടി) സമീപകാല നീക്കത്തിനെതിരെ കേരളാ പൊതുവിദ്യാഭ്യാസ മന്ത്രി വി. ശിവൻകുട്ടി പ്രതിഷേധം രേഖപ്പെടുത്തി. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന് കത്തയച്ച മന്ത്രി, ഈ തീരുമാനം ഭാഷാ വൈവിധ്യത്തെയും സാംസ്കാരിക ധാർമ്മികതയെയും ദുർബലപ്പെടുത്തുന്നതായി വിമർശിച്ചു.

എൻസിഇആർടി പുറത്തിറക്കുന്ന ഇംഗ്ലീഷ് പാഠപുസ്തകങ്ങൾക്ക് "പൂർവി" (6, 7 ക്ലാസുകൾ), "മൃദംഗ്" (1, 2 ക്ലാസുകൾ), "സന്തൂർ" (3, 4 ക്ലാസുകൾ), "ഗണിത പ്രകാശ്" (6ാം ക്ലാസിലെ ഗണിതപുസ്തകം) തുടങ്ങിയ ഹിന്ദി പേരുകളാണ് നൽകിയത്. ഈ നടപടി കേരളം സാംസ്കാരിക ഏകീകരണത്തിനുള്ള ശ്രമമായും വിദ്യാഭ്യാസ രംഗത്തെ ഒരു പിന്നോട്ടടി എന്ന നിലയിൽ തന്നെ കാണുന്നുവെന്ന് കത്തിൽ മന്ത്രി ചൂണ്ടിക്കാട്ടി.

പാഠപുസ്തകങ്ങൾക്ക് 
 പേരിടൽ കേവലം ഒരു സൗന്ദര്യാത്മക തീരുമാനമല്ല,, വിദ്യാർത്ഥികളുടെ ഭാഷാപാരമ്പര്യവും സാമൂഹ്യമായ പശ്ചാത്തലവും പരിഗണിച്ചായിരിക്കേണ്ട അക്കാദമിക് തീരുമാനമാണെന്നും മന്ത്രി വ്യക്തമാക്കി. ഇന്ത്യൻ ശാസ്ത്രീയ സംഗീതത്തിൽ നിന്നുള്ള പദങ്ങൾ ഉപയോഗിച്ച് പാഠപുസ്തകങ്ങൾ നാമകരണം ചെയ്യുന്നത്, ഒരു ഭാഷയുടെ പാരമ്പര്യത്തെ മറ്റുള്ളവയ്‌ക്ക് മേൽ അടിച്ചേൽപ്പിക്കുന്ന നിലയിലേക്കാണ് നീങ്ങുന്നതെന്ന് കത്തിൽ മന്ത്രി വ്യക്തമാക്കി.

"ഭാഷാപരമായും സാംസ്കാരികമായും വൈവിധ്യത്തിൽ സമ്പന്നമായ കേരളം, എൻസിഇആർടിയുടെ ഈ ഏകപക്ഷീയ തീരുമാനത്തെ ഫെഡറൽ തത്വങ്ങൾക്കും വിദ്യാഭ്യാസത്തിലെ സഹകരണ സമീപനത്തിനും എതിരെ നിലകൊള്ളുന്നവയാണെന്ന നിലയിൽ കാണുന്നു" – എന്ന് കത്തിൽ വാക്കുകളിൽ ഉൾപ്പെടുത്തി.

എൻസിഇആർടി ഈ തീരുമാനം പുനപരിശോധിക്കണമെന്ന്, പാഠപുസ്തകങ്ങൾ ഭാഷാപരമായ ആധിപത്യത്തിന്റെ ഉപകരണങ്ങളായി മാറാതിരിക്കാൻ കേന്ദ്ര വിദ്യാഭ്യാസ മന്ത്രാലയം അടിയന്തിരമായി ഇടപെടണമെന്നും അദ്ദേഹം ആവശ്യപ്പെട്ടു. പഠനത്തിനും ഉൾക്കൊള്ളലിനും സഹായകമായ വിദ്യാഭ്യാസോപകരണങ്ങൾ എന്ന നിലയിലാണ് പാഠപുസ്തകങ്ങൾ നിലനിൽക്കേണ്ടതെന്നും, അതിനുവേണ്ടിയുള്ള നിർദേശങ്ങളും കത്തിൽ മന്ത്രിയർപ്പിച്ചു.

Kerala Education Minister V. Sivankutty has strongly opposed NCERT's decision to assign Hindi names to English-medium school textbooks. In a letter to Union Education Minister Dharmendra Pradhan, he termed it a cultural imposition and violation of federal principles. He demanded the withdrawal of the move, emphasizing the need to respect linguistic diversity and academic neutrality in education.