ഭോപ്പാല്‍: മധ്യപ്രദേശിലെ ആശുപത്രിയില്‍ ഒരു വൃദ്ധനെ ക്രൂരമായി ഉപദ്രവിച്ച ഒരു ഡോക്ടറുടെ വീഡിയോ ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുകയാണ്. ഛത്തര്‍പൂര്‍ ജില്ല ആശുപത്രിയിലെ ഒരു യുവ ഡോക്ടര്‍ 77 വയസ്സുള്ള ഒരു വൃദ്ധനെ മര്‍ദിക്കുകയും ആശുപത്രി വരാന്തയിലൂടെ വലിച്ചിഴച്ചു കൊണ്ടു പോകുകയും ചെയ്യുന്ന സംഭവമാണ് വീഡിയോയിലുള്ളത്. ഏപ്രില്‍ 17നായിരുന്നു സംഭവം. 

രോഗിയായ ഭാര്യക്കൊപ്പം ഛത്തര്‍പൂര്‍ ജില്ലാ ആശുപത്രിയില്‍ ചികിത്സക്കെത്തിയ എത്തിയ ഉദ്ധവ് ലാല്‍ ജോഷിയെന്ന വൃദ്ധനാണ് ക്രൂരമര്‍ദനത്തിന് ഇരയായത്. മറ്റുള്ളവരോടൊപ്പം വരിയില്‍ നില്‍ക്കവെ പ്രകോപനമൊന്നുമില്ലാതെ ഡോക്ടര്‍ അദ്ദേഹത്തെ പെട്ടെന്ന് ആക്രമിക്കുകയായിരുന്നുവെന്ന് ജോഷി പറയുന്നു. 'എന്തിനാണ് വരിയില്‍ നില്‍ക്കുന്നത്? 'എന്ന ചോദ്യത്തോടെയാണ് ഡോക്ടര്‍ പ്രശ്‌നങ്ങള്‍ ആരംഭിച്ചത്. വിശദീകരിക്കാന്‍ ശ്രമിച്ചപ്പോള്‍ ഡോക്ടര്‍ അദ്ദേഹത്തെ അടിക്കുകയും പിന്നീട് ആശുപത്രി പരിസരത്തുള്ള പോലീസ് ഔട്‌പോസ്റ്റിലേക്ക് വലിച്ചിഴച്ചു കൊണ്ടുപോകുകയും ചെയ്യുകയായിരുന്നു.

'ഡോക്ടര്‍ എന്നെ ചവിട്ടി തള്ളിയിട്ടു. വലിച്ചിഴച്ചുകൊണ്ടുപോയപ്പോള്‍ എന്റെ കണ്ണട വീണ് പൊട്ടി. ചെരിപ്പ് വലിച്ചെറിഞ്ഞു. കൊല്ലുമെന്ന് ഭീഷണിപ്പെടുത്തി. ഭാര്യയെ ഉപദ്രവിച്ചു.' ജോഷി മാധ്യമങ്ങളോട് വ്യക്തമാക്കി.

സംഭവസ്ഥലത്തുണ്ടായിരുന്നവര്‍ ഇടപെട്ടതോടെയാണ് ഡോക്ടര്‍ മര്‍ദനം അവസാനിപ്പിച്ചത്. അതേസമയം, ഡോക്ടര്‍ക്കെതിരെ കര്‍ശന നടപടി എടുക്കണമെന്നാവശ്യപ്പെട്ട് പ്രതിഷേധങ്ങള്‍ ഉയരുകയാണ്. സംഭവത്തില്‍ അന്വേഷണം നടത്തുകയും ഉചിതമായ നടപടി സ്വീകരിക്കുകയും ചെയ്യുമെന്ന് ആശുപത്രി അധികൃതര്‍ വ്യക്തമാക്കി.

A disturbing video from Madhya Pradesh shows a doctor brutally beating a 77-year-old man. The incident has sparked outrage and raised concerns about the doctor's conduct. Authorities are investigating the matter, and action will be taken based on the findings