മലപ്പുറം: സംസ്ഥാന ഹജ്ജ് കമ്മിറ്റിക്കുകീഴിൽ ഈ വർഷത്തെ ആദ്യ ഹജ്ജ് വിമാന സർവിസുകൾ മെയ് 10നു കരിപ്പൂരിൽനിന്ന് പുറപ്പെടും. 145 തീർഥാടകരുമായി എയർ ഇന്ത്യ എക്സ്പ്രസ് വിമാനം പുലർച്ചെ ഒരു മണിക്കാണ് പുറപ്പെടുക. ഹജ്ജ് ക്യാംപ് മെയ് ഒമ്പതിന് ആരംഭിക്കും. 11ന് കണ്ണൂരിൽനിന്നും 16ന് കൊച്ചിയിൽനിന്നും ഹജ്ജ് വിമാനങ്ങൾ പുറപ്പെടും. കണ്ണൂരിൽ മെയ് 10നും കൊച്ചിയിൽ മെയ് 15നും ഹജ്ജ് ക്യാംപുകൾ ആരംഭിക്കും. വിമാന കമ്പനികൾ നൽകിയ ഷെഡ്യൂൾ പ്രകാരം ഹജ്ജ് സർവിസുകളും ക്യാംപും കുറ്റമറ്റ രീതിയിൽ നടത്തുന്നതിന് തയാറെടുപ്പുകൾ നടത്തി വരുന്നതായി സംസ്ഥാന ഹജ്ജ് കമ്മറ്റി ചെയർമാൻ ഡോ. ഹുസൈൻ സഖാഫി ചുള്ളിക്കോട് പറഞ്ഞു.

തീർഥാടകരുടെ പാസ്പോർട്ട്, അനുബന്ധ രേഖകൾ മെയ് ആദ്യവാരം ക്യാംപുകളിലെത്തും. ഇതോടെ ഹജ്ജ് സെല്ലിന്റെ പ്രവർത്തനങ്ങൾ ക്യാംപിൽ തുടങ്ങും. വിവിധ വകുപ്പുകളിൽനിന്ന് ഡെപ്യൂട്ടേഷനിൽ എത്തുന്ന ഉദ്യോഗസ്ഥരാണ് സെല്ലിന്റെ ചുമതല വഹിക്കുന്നത്. ഇവർ ഓരോ ദിവസത്തേയും തീർഥാടകരുടെ യാത്രാരേഖകൾ ക്രമീകരിക്കും. തീർഥാടരുടെ കുത്തിവയ്പ്പ്, തുള്ളിമരുന്ന് വിതരണം അടുത്തയാഴ്ചയോടെ ആരംഭിക്കും. മെനിഞ്ചൈറ്റിസ്, സീസൺ ഇൻഫ്‌ളുവൻസ വാക്സിൻ (എസ്.ഐ.വി) എന്നിവ ഈ ആഴ്ച എത്തും. യാത്രയുടെ 10 ദിവസം മുമ്പാണ് തുള്ളിമരുന്ന്, കുത്തിവയ്പ്പു നടപടികൾ പൂർത്തിയാക്കേണ്ടത്.

This years Hajj pilgrimage in the state begins first flight from Karipur