ബാംഗ്ലൂർ: ഐപിഎല്ലിൽ ഇന്ന് നടക്കുന്ന മത്സരത്തിൽ റോയൽ ചലഞ്ചേഴ്‌സ് ബെംഗളൂരുവും രാജസ്ഥാൻ റോയൽസുമാണ് ഏറ്റുമുട്ടുന്നത്. ആർസിബിയുടെ തട്ടകമായ ചിന്നസ്വാമി സ്റ്റേഡിയത്തിലാണ് മത്സരം നടക്കുന്നത്. പ്ലേ ഓഫ് സാധ്യതകൾ നിലനിർത്തണമെങ്കിൽ രാജസ്ഥാന് വിജയം അനിവാര്യമാണ്. മറുഭാഗത്ത് പോയിന്റ് പട്ടികയിൽ മുന്നോട്ട് കുതിക്കണമെങ്കിൽ ബെംഗളൂരുവിനും ജയം തുടരണം. 

ഈ നിർണായകമായ മത്സരത്തിൽ രാജസ്ഥാൻ ഓപ്പണർ യശ്വസി ജെയ്‌സ്വാളിന് ഒരു തകർപ്പൻ റെക്കോർഡ് കൈവരിക്കാനുള്ള സുവർണാവസരമുണ്ട്. ഐപിഎല്ലിൽ 2000 റൺസ് സ്വന്തമാക്കാനാണ് ജെയ്‌സ്വാളിന് സാധിക്കുക. ഇതിനായി 86 റൺസ് കൂടിയാണ് ജെയ്‌സ്വാളിന് വേണ്ടത്. അടുത്ത രണ്ട് മത്സരത്തിനുള്ളിൽ ഈ റൺസ് നേടിയാൽ ഇതിഹാസ താരം സച്ചിൻ ടെണ്ടുൽക്കറിനെ മറികടക്കാൻ ജെയ്‌സ്വാളിന് സാധിക്കും.

ഐപിഎല്ലിൽ ഏറ്റവും വേഗത്തിൽ 2000 റൺസ് നേടുന്ന താരങ്ങളുടെ പട്ടികയിൽ മൂന്നാം സ്ഥാനത്തെത്താനാണ് ജെയ്‌സ്വാളിന് സാധിക്കുക. സച്ചിൻ 63 മത്സരങ്ങളിൽ നിന്നുമാണ് 2000 റൺസ് സ്വന്തമാക്കിയത്. ജെയ്‌സ്വാൾ ഇതിനോടകം തന്നെ 60 മത്സരങ്ങളിൽ നിന്നുമായി 1914 റൺസാണ് നേടിയിട്ടുള്ളത്. അതുകൊണ്ട്‌ തന്നെ ഈ രണ്ട് മത്സരങ്ങൾക്കുള്ളിൽ 86 റൺസ് നേടിയാൽ ജെയ്‌സ്വാളിന് സച്ചിനെ മറികടക്കാൻ സാധിക്കും. 

ഈ നേട്ടത്തിൽ ഒന്നാം സ്ഥാനത്തുള്ളത് ഋതുരാജ് ഗെയ്ക്‌വാദ് ആണ്. 57 ഇന്നിങ്‌സുകളിൽ നിന്നുമാണ് ഗെയ്ക്വാദ് 2000 റൺസ് സ്വന്തമാക്കിയത്. 60 ഇന്നിങ്‌സുകളിൽ നിന്നുമായി ഈ നേട്ടം കൈവരിച്ച കെഎൽ രാഹുലാണ്‌ പട്ടികയിലെ രണ്ടാമൻ. ഈ പട്ടികയിൽ ഇന്ത്യൻ താരങ്ങൾക്ക് പുറമെ വിദേശ താരങ്ങളിൽ ഒന്നാം സ്ഥാനത്തുള്ളത് മുൻ വെസ്റ്റ് ഇൻഡീസ് വെടിക്കെട്ട് ഓപ്പണർ ക്രിസ് ഗെയ്‌ലാണ്. 48 ഇന്നിങ്സിൽ നിന്നുമാണ് ഗെയ്ൽ ഈ റെക്കോർഡ് കൈവരിച്ചത്. രണ്ടാമതുള്ളത് മുൻ ഓസ്‌ട്രേലിയൻ താരം ഷോൺ മാർഷാണ്. 52 ഇന്നിങ്‌സുകളിൽ നിന്നാണ് മാർഷ് ഈ നേട്ടം കൈവരിച്ചത്. 

ഈ സീസണിൽ രാജസ്ഥാന് വേണ്ടി മികച്ച ഫോമിലാണ് ജെയ്‌സ്വാൾ കളിച്ചുകൊണ്ടിരിക്കുന്നത്. ഈ സീസണിൽ എട്ട് മത്സരങ്ങളിൽ നിന്നും നാല് അർദ്ധ സെഞ്ച്വറികൾ ഉൾപ്പടെ 307 റൺസാണ് ജെയ്‌സ്വാൾ നേടിയിട്ടുള്ളത്. 38.37 ശരാശരിയിലും 139.54 സ്ട്രൈക്ക്റേറ്റിലും ആണ് താരം ബാറ്റ് വീശിയത്. ഈ മികച്ച ഫോം ആർസിബിക്കെതിരെയും തുടരുമെന്നാണ് പ്രതീക്ഷിക്കുന്നത്. 

Yashasvi Jaiswal Need 86 Runs to Break Sachin Tendulkar Record in IPL History