റിയാദ്: വരാനിരിക്കുന്ന വാര്‍ഷിക ഹജ്ജ് തീര്‍ത്ഥാടനവുമായി ബന്ധപ്പെട്ട് വ്യാജ പ്രചാരണങ്ങള്‍ നടത്തുന്നവര്‍ക്കെതിരെ നടപടി ശക്തമാക്കി സഊദി സര്‍ക്കാര്‍. അനധികൃത തീര്‍ത്ഥാടകരെ തടയാന്‍ രാജ്യത്ത് കര്‍ശന നടപടികള്‍ സ്വീകരിച്ചിട്ടുണ്ട്. ALSO READ: ഇനി കൂളായി ഹജ്ജും ഉംറയും ചെയ്യാം; ശരീരം തണുപ്പിക്കുന്ന 'കൂളര്‍ ഇഹ്‌റാം വസ്ത്രം' അവതരിപ്പിച്ച് സഊദി

ഹജ്ജ് തീര്‍ത്ഥാടനവുമായി ബന്ധപ്പെട്ട് സോഷ്യല്‍ മീഡിയയില്‍ 'വ്യാജവും തെറ്റിദ്ധരിപ്പിക്കുന്നതുമായ' പരസ്യങ്ങള്‍ പ്രസിദ്ധീകരിച്ച് തട്ടിപ്പ് നടത്തിയെന്ന് ആരോപിച്ച് ഖമീസ് മുഷൈത്തിന്റെ തെക്കുപടിഞ്ഞാറന്‍ ഗവര്‍ണറേറ്റില്‍ പൊലിസ് ഒരു ബംഗ്ലാദേശി പ്രവാസിയെ അറസ്റ്റ് ചെയ്തു.

മക്കയില്‍ താമസവും ഗതാഗതവും പ്രദാനം ചെയ്യുമെന്ന് ഇയാള്‍ അവകാശപ്പെട്ടിരുന്നുവെന്ന് പൊലിസ് പറഞ്ഞു. നിയമവിരുദ്ധമായ അവകാശവാദം ഉന്നയിച്ചതിനും പൗരന്മാരെയും രാജ്യത്തെ താമസക്കാരെയും തെറ്റിദ്ധരിപ്പിക്കാനും ശ്രമിച്ചതിനാണ് ഇയാളെ അറസ്റ്റു ചെയ്തിരിക്കുന്നത്.

ഹജ്ജ് യാത്രകളെ സംബന്ധിച്ചുള്ള വ്യാജ പരസ്യദാതാക്കളെ ലക്ഷ്യമിട്ടുള്ള സഊദി അധികൃതരുടെ നടപടിയില്‍ കുടുങ്ങിയ ഏറ്റവും അവസാനത്തെ കണ്ണിയാണ് പിടിയിലായ ബംഗ്ലാദേശി പൗരന്‍.

സമാനമായ പരസ്യങ്ങള്‍ പ്രസിദ്ധീകരിച്ചതിന് ഒരു സുഡാനീസ് പ്രവാസിയെയും ഒരു സഊദി പൗരനെയും അറസ്റ്റ് ചെയ്തതായി മക്ക പൊലിസ് അറിയിച്ചിരുന്നു. തീര്‍ത്ഥാടന കര്‍മ്മങ്ങള്‍ നിര്‍വഹിക്കുന്നതിന് ഹജ്ജ് വിസ നിര്‍ബന്ധമാണെന്നും വിസിറ്റ് വിസയില്‍ വിശുദ്ധ യാത്ര നടത്താന്‍ അനുവദിക്കില്ലെന്നും സഊദി അധികൃതര്‍ ആവര്‍ത്തിച്ച് വ്യക്തമാക്കിയിരുന്നു. ALSO READ: ഹജ്ജ് 2025: തൊഴിലാളികൾക്കുള്ള ആരോഗ്യ നിയമങ്ങൾ വിശദീകരിച്ച് സഊദി

80 രാജ്യങ്ങളിലെ ഹജ്ജ് അഫയേഴ്സ് ഓഫീസുകളുമായി ഏകോപിപ്പിച്ച് സഊദി അധികൃതര്‍ നല്‍കുന്ന ഹജ്ജ് വിസയോ 126 രാജ്യങ്ങളില്‍ നിന്നുള്ള തീര്‍ത്ഥാടകര്‍ക്കായി നിയുക്തമാക്കിയിരിക്കുന്ന നുസ്‌ക് ഹജ്ജ് പ്ലാറ്റ്ഫോം വഴിയോ വിദേശ തീര്‍ത്ഥാടകര്‍ അനുമതി നേടണമെന്ന് മന്ത്രാലയം അറിയിച്ചു.

എല്ലാ വിദേശ ഉംറ തീര്‍ഥാടകരും ഏപ്രില്‍ 29നകം രാജ്യം വിടണമെന്ന് അടുത്തിടെ സഊദി അറേബ്യ വ്യക്തമാക്കിയിരുന്നു. നിയമവിരുദ്ധമായി ഹജ്ജ് നിര്‍വഹിക്കുന്നതിനായി ചില വിദേശ സന്ദര്‍ശകര്‍ ഉംറ വിസ കാലാവധി കഴിഞ്ഞും രാജ്യത്ത് തങ്ങാന്‍ ശ്രമിക്കുമെന്ന ആശങ്കകള്‍ക്കിടയിലാണ് മുന്നറിയിപ്പ്.

Saudi authorities intensify efforts against fraudulent Hajj advertisements, arresting multiple individuals and emphasizing the exclusive use of the official Nusuk platform for pilgrimage bookings.