കുവൈത്ത് സിറ്റി: വ്യത്യസ്ത കേസുകളിലായി എട്ടുപേര്‍ക്ക് കോടതി വിധിച്ച വധശിക്ഷ നടപ്പാക്കാന്‍ കുവൈത്ത് അധികൃതര്‍.  വരും ദിവസങ്ങളില്‍  അധികൃതര്‍ വധശിക്ഷ നടപ്പാക്കാന്‍ തയ്യാറെടുക്കുന്നതായി കുവൈത്ത് മാധ്യമങ്ങള്‍ റിപ്പോര്‍ട്ട് ചെയ്തു.

സ്ത്രീകള്‍ ഉള്‍പ്പെടെ വധശിക്ഷയ്ക്ക് വിധിക്കപ്പെട്ട എട്ട് തടവുകാരുടെ വധശിക്ഷയാണ് നടപ്പാക്കുകയെന്ന് സുരക്ഷാ വൃത്തങ്ങളെ ഉദ്ധരിച്ച് കുവൈത്ത് ദിനപത്രം അല്‍ റായ് റിപ്പോര്‍ട്ട് ചെയ്തു.

കുവൈത്തിലെ സെന്‍ട്രല്‍ ജയിലിലാണ് വധശിക്ഷ നടപ്പാക്കുക. അടിയന്തര, ഫോറന്‍സിക് മെഡിസിന്‍ സേവനങ്ങള്‍ ഉള്‍പ്പെടെയുള്ള അധികാരികള്‍ അവിടെ ഒരുക്കങ്ങള്‍ പൂര്‍ത്തിയാക്കിയിട്ടുണ്ട്.

പബ്ലിക് പ്രോസിക്യൂഷന്‍, ആഭ്യന്തര മന്ത്രാലയം, മറ്റ് അധികാരികള്‍ എന്നിവരുടെ പ്രതിനിധികള്‍ വധശിക്ഷ നടപ്പാക്കുന്ന ദിവസം ഹാജരാകുമെന്ന് സര്‍ക്കാരുമായി അടുത്ത ബന്ധം പുലര്‍ത്തുന്ന ഉന്നത ഉദ്യോഗസ്ഥന്‍ കൂട്ടിച്ചേര്‍ത്തു. 

ജനുവരിയില്‍, കൊലപാതകക്കുറ്റത്തിന് ശിക്ഷിക്കപ്പെട്ട എട്ട് പ്രതികളെ കുവൈത്തില്‍ വധശിക്ഷയ്ക്ക് വിധേയരാക്കിയിരുന്നു. 

ഇവരില്‍ ഏഴ് പേര്‍ കുവൈത്ത് പൗരന്മാരും ഒരാള്‍ ഈജിപ്ഷന്‍ പൗരനുമായിരുന്നു. വധശിക്ഷക്ക് വിധിക്കപ്പെട്ട ഏഴു കുവൈത്തി പൗരന്മാരില്‍ ആറുപേര്‍ പുരുഷന്മാരും ഒരാള്‍ സ്ത്രീയുമായിരുന്നു. 

ഈ വര്‍ഷം കുവൈത്തില്‍ നടപ്പിലാക്കിയ ആദ്യ വധശിക്ഷയായിരുന്നു ഇത്. കഴിഞ്ഞ സെപ്റ്റംബറില്‍, സുഹൃത്തിനെ കൊലപ്പെടുത്തിയ കേസില്‍ ശിക്ഷിക്കപ്പെട്ട ഒരു സ്ത്രീ ഉള്‍പ്പെടെ ഏഴ് കുറ്റവാളികളെ വധശിക്ഷയ്ക്ക് വിധേയരാക്കിയിരുന്നു.

കുവൈത്തില്‍ ക്രിമിനല്‍ കോടതി, അപ്പീല്‍ കോടതി, കാസേഷന്‍ കോടതി എന്നിവയ്ക്ക് മുമ്പാകെയുള്ള വ്യവഹാര പ്രക്രിയയുടെ മൂന്ന് തലങ്ങള്‍ പൂര്‍ത്തിയായ ശേഷമാണ് വധശിക്ഷ നടപ്പാക്കേണ്ടത്. ഈ വിധി രാജ്യത്തിന്റെ അമീര്‍ അംഗീകരിക്കുകയും വേണം.

Kuwait announces plans to execute eight individuals, including a woman, in a rare move reflecting the country's strict enforcement of capital punishment for serious crimes.