ന്യൂഡല്‍ഹി: ദേവികുളം എംഎല്‍എ എ. രാജക്ക് ആശ്വാസം. എംഎല്‍എയായി രാജക്ക് തുടരാമെന്ന് സുപ്രീം കോടതി ഉത്തരവ്. ഹൈക്കോടതി വിധിയില്‍ പിഴവുകള്‍ ഉണ്ടെന്ന് ചൂണ്ടിക്കാട്ടി സുപ്രീം കോടതി ഹൈക്കോടതി വിധി റദ്ദാക്കി.

2023 മാര്‍ച്ചില്‍ പട്ടികജാതി വിഭാഗങ്ങള്‍ക്ക് സംവരണം ചെയ്ത മണ്ഡലത്തില്‍ എ. രാജക്ക് മത്സരിക്കാന്‍ യോഗ്യതയില്ലെന്ന് വിലയിരുത്തി കേരള ഹൈക്കോടതി രാജയുടെ നിയമസഭാംഗത്വം റദ്ദാക്കിയിരുന്നു.

ജഡ്ജിമാരായ പി.കെ മിശ്ര, അമാനുള്ള എന്നിവര്‍ അടങ്ങിയ ബെഞ്ചാണ് നിര്‍ണായക വിധി പുറപ്പെടുവിച്ചത്. 

ക്രിസ്തുമത വിശ്വാസിയായ രാജക്ക് സംവരണ മണ്ഡലത്തില്‍ മത്സരിക്കാന്‍ യോഗ്യതയില്ലെന്ന് എതിര്‍ സ്ഥാനാര്‍ത്ഥിയായ ഡി. കുമാറാണ് ഹരജി നല്‍കിയത്. ഇതിനെതിരെ രാജ സുപ്രീം കോടതിയെ സമീപിച്ചിരുന്നു.

പറയര്‍ സമുദായാംഗം എന്ന് അവകാശപ്പെട്ടുകൊണ്ടാണ് രാജ തിരഞ്ഞെടുപ്പില്‍ മത്സരിച്ചത്. രാജ വളരെ മുമ്പ് ക്രിസ്തുമതത്തിലേക്ക് മാറിയതാണെന്നും ആ വിശ്വാസമാണ് പിന്തുടരുന്നത് എന്നും വിലയിരുത്തിയായിരുന്നു ഹൈക്കോടതി നടപടി.

തമിഴ്‌നാട്ടില്‍ നിന്നും മൂന്നാറിലേക്ക് കുടിയേറിയ പറയര്‍ വിഭാഗക്കാരായ മാതാപിതാക്കള്‍ക്ക് ഉണ്ടായ മകനാണ് തന്റെ പിതാവ് എന്ന് രാജ സുപ്രീംകോടതിയില്‍ വാദിച്ചു. 1950 ഓഗസ്റ്റ് 10ന് മുമ്പ് കുടിയേറിയതിനാല്‍ തമിഴ്‌നാട്ടില്‍ സംവരണത്തിനുണ്ടായിരുന്ന അര്‍ഹത കേരളത്തിലും ഇവര്‍ക്കുണ്ടെന്ന് രാജക്കുവേണ്ടി ഹാജരായ വി. ഗിരി വാദിച്ചു.

1950ന് മുമ്പ് തന്റെ അച്ഛന്റെ അമ്മ പുഷ്പം കേരളത്തില്‍ എത്തിയിരുന്നു എന്ന് തെളിയിക്കാനായതാണ് കേസില്‍ നിര്‍ണായകമായത്. 1949 മുതല്‍ തന്നെ മൂന്നാറിലെ കണ്ണന്‍ദേവന്‍ പ്ലാന്റേഷനില്‍ ജോലി ചെയ്തിരുന്ന പുഷ്പത്തിന്റെ രേഖകളാണ് രാജ സുപ്രീം കോടതിക്ക് കൈമാറിയത്.