പഴങ്ങളില്‍ വച്ച് ആപ്പിളിനെ പൊതുവേ പോഷകങ്ങളുടെ കലവറയായാണ് കണക്കാക്കുന്നത്. ഇത് എല്ലാവര്‍ക്കും ഇഷ്ടവുമാണ്. കുട്ടികള്‍ക്കും മുതിര്‍ന്നവര്‍ക്കുമൊക്കെ ആപ്പിള്‍ കഴിക്കാന്‍ ഇഷ്ടം തന്നെയാണ്. ഡോക്ടറെ അകറ്റിനിര്‍ത്താന്‍ ആപ്പിള്‍ കഴിക്കുന്നതു കൊണ്ട് സാധിക്കുമെന്നും സമീപകാല പഠനങ്ങളും പറയുന്നുണ്ട്.

നാരുകളും പോഷകങ്ങളുമടങ്ങിയ ആപ്പിള്‍ ദഹനവ്യവസ്ഥയെ പിന്തുണയ്ക്കുന്നു. എന്നാല്‍ ആപ്പിള്‍ തന്നെ പലതരത്തിലുണ്ട്. ഇതില്‍ തന്നെ ചുവന്നതരവും ഗ്രീന്‍ ആപ്പിളുമാണ് പ്രധാനം. ഇതില്‍ ഏതാണ് കുടലിന്റെ ആരോഗ്യത്തിന് ഗുണകരമായത്. എന്താണ് ഇവയിലുണ്ടാകുന്ന വ്യത്യാസം. പഞ്ചസാരയുടെ അളവും ആന്റിഓക്‌സിഡന്റുകളും നാരുകളുമാണ് ഗ്രീന്‍ ആപ്പിളിന്റെയും ചവന്ന ആപ്പിളിന്റെയും പോഷകഗുണത്തില്‍ ഉണ്ടാക്കുന്ന വ്യത്യാസങ്ങള്‍.

ചുവന്ന ആപ്പിള്‍

മധുരമുള്ള നല്ല ചുവന്ന ആപ്പിളില്‍ ആന്തോസയാനി എന്ന ആന്റിഓക്‌സിഡന്റുകള്‍ ധാരാളം അടങ്ങിയിട്ടുണ്ട്. ആപ്പിളിന്റെ തൊലിയിലാണ് ഇവ അടങ്ങിയിട്ടുള്ളത്. ഇത് ഓക്‌സിഡേറ്റീവ് സമ്മര്‍ദം കുറയ്ക്കാനും ഹൃദയാരോഗ്യം മെച്ചപ്പെടുത്താനും സഹായിക്കുന്നു. ശരീരവീക്കം തടയുന്നതിലൂടെ കുടലിന്റെ ആരോഗ്യം മെച്ചപ്പെടുത്താനും നല്ലതാണ്.

ഗ്രീന്‍ ആപ്പിള്‍

പുളിയാണ് ഗ്രീന്‍ ആപ്പിളുകളില്‍ മധുരത്തേക്കാള്‍ മുന്നിട്ടു നില്‍ക്കുക. കൂടാതെ ഇവയ്ക്ക് ഗ്ലൈസെമിക സൂചികയും കുറവായിരിക്കും. അതുകൊണ്ട് തന്നെ പ്രമേഹരോഗികള്‍ക്ക് ഗ്രീന്‍ ആപ്പിള്‍ കഴിക്കുന്നത് നല്ലതാണ്. ഗ്രീന്‍ ആപ്പിളില്‍ കുറച്ചേ പഞ്ചസാരയുള്ളൂ. നാരുകളാണെങ്കില്‍ ധാരാളമുണ്ടുതാനും. നാരുകളുടെ കാര്യത്തിലും ചുവന്ന ആപ്പിളിനെക്കാള്‍ ഗ്രീന്‍ ആപ്പിള്‍ തന്നെയാണ് മുന്നില്‍. എളുപ്പത്തില്‍ ദഹിക്കുന്ന നാരുകളും ഇതിലടങ്ങിയിട്ടുണ്ട്.

ഇത് ശരീരത്തിലെ വിഷാംശങ്ങളെ നീക്കം ചെയ്യാന്‍ സഹായിക്കുന്നു.  ഇത് മലബന്ധം കുറയ്ക്കാനും കുടലിലെ നല്ല ബക്ടീരിയയുടെ വളര്‍ച്ചയെ സഹായിക്കുകയും ചെയ്യുന്നു. ഇവയില്‍ ആന്റിഇന്‍ഫ്‌ളമേറ്റിറി, ആന്റിഓക്‌സിഡന്റ് ഗുണങ്ങള്‍ അടങ്ങിയ പോളിഫിനോളുകള്‍ അടങ്ങിയിട്ടുണ്ട്.

ചീത്ത കൊളസ്‌ട്രോളിന്റെ അളവും കുറയ്ക്കുന്നു.പൊട്ടാസ്യവും ജീവകം കെയും കാല്‍സ്യവുമടങ്ങിയ ഗ്രീന്‍ ആപ്പിള്‍ സ്ത്രീകള്‍ക്ക് വളരെ നല്ലതാണ്. എല്ലുകളുടെ ആരോഗ്യത്തിനും ഇത് നല്ലതാണ്. ഇതിലടങ്ങിയ റൂട്ടീന്‍ എന്ന സംയുക്തം രക്തം കട്ടപിടിക്കുന്ന എന്‍സൈമുകളോട് പൊരുതുകയും ചെയ്യും. 

മികച്ചത്  ചുവപ്പോ പച്ചയോ..? 

ചുവന്ന ആപ്പിളും പച്ച ആപ്പിളും കുടലിന്റെ ആരോഗ്യത്തിന് മികച്ചതു തന്നെയാണ്. എന്നാല്‍ പഞ്ചസാരയുടെ അളവു കുറവായതുകൊണ്ടും നാരുകളുടെ അളവു കൂടുതലായതു കൊണ്ടും ചുവന്ന ആപ്പിളിനേക്കാള്‍ അല്‍പം മികച്ചത് ഗ്രീന്‍ ആപ്പിള്‍ തന്നെയാണ്. എന്നാല്‍ ചുവന്ന ആപ്പിള്‍ ഗ്രീന്‍ ആപ്പിളിനെ അപേക്ഷിച്ച് കൂടുതല്‍ പ്രീബയോക്ടിക് ആണ്. കൂടാതെ ഇവ രണ്ടിലും അടങ്ങിയ വിറ്റാമിന്‍ സി, പൊട്ടാസ്യം എന്നിവ പ്രതിരോധശേഷി വര്‍ധിപ്പിക്കാന്‍ സഹായിക്കും.

ആപ്പിള്‍ കഴിക്കുമ്പോള്‍ തൊലിയോടെ കഴിക്കാന്‍ ശ്രമിക്കുക. കാരണം ആപ്പിളിന്റെ തൊലിയിലാണ് ആന്റിഓക്‌സിഡന്റുകളും നാരുകളും ധാരാളം അടങ്ങിയിരിക്കുന്നത്. നന്നായി വൃത്തിയായി കഴുകി തൊലിയോട് കൂടെ കഴിക്കാന്‍ ശ്രദ്ധിക്കുക.