കൊച്ചി: ഇന്ത്യ-പാക് സംഘർഷത്തിന്റെ പശ്ചാത്തലത്തിൽ കേരളത്തിലെ വിമാനത്താവളങ്ങളിൽ ത്രിതല സുരക്ഷാ പരിശോധന ശക്തമാക്കി. യാത്രക്കാർ ആഭ്യന്തര വിമാനങ്ങൾക്ക് മൂന്ന് മണിക്കൂർ മുൻപും അന്താരാഷ്ട്ര വിമാനങ്ങൾക്ക് അഞ്ച് മണിക്കൂർ മുൻപും എത്തണമെന്ന് നെടുമ്പാശ്ശേരി അന്താരാഷ്ട്ര വിമാനത്താവളം അറിയിച്ചു. കർശനമായ സുരക്ഷാ പരിശോധനകൾ മൂലം അധിക സമയം വേണ്ടിവരുന്നതിനാലാണ് ഈ നിർദേശം. അവസാന നിമിഷത്തെ തിരക്കും ബുദ്ധിമുട്ടും ഒഴിവാക്കാൻ യാത്രക്കാർ സഹകരിക്കണമെന്ന് അധികൃതർ അഭ്യർഥിച്ചു.

ത്രിതല പരിശോധന: വിമാനത്താവളങ്ങളിൽ സുരക്ഷ വർധിപ്പിച്ചു

അതിർത്തിയിലെ സംഘർഷ സാഹചര്യം കണക്കിലെടുത്ത് ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി (ബികാസ്) നിർദേശപ്രകാരം കേരളത്തിലെ വിമാനത്താവളങ്ങളിൽ ത്രിതല സുരക്ഷാ പരിശോധന ഏർപ്പെടുത്തി. തിരുവനന്തപുരം, നെടുമ്പാശ്ശേരി, കോഴിക്കോട്, കണ്ണൂർ അന്താരാഷ്ട്ര വിമാനത്താവളങ്ങളിൽ ദേഹപരിശോധന, ഐ.ഡി പരിശോധന, സെക്കൻഡറി ലാഡർ പോയിന്റ് ചെക്ക് (എസ്.എൽ.പി.സി) എന്നിവ ഉൾപ്പെടുത്തിയാണ് പരിശോധന. ബോർഡിങ് ഗേറ്റിന് സമീപം ഹാൻഡ് ഹെൽഡ് മെറ്റൽ ഡിറ്റക്ടർ ഉപയോഗിച്ച് യാത്രക്കാരെയും ക്യാബിൻ ബാഗുകളും വിശദമായി പരിശോധിക്കും.

വിമാനത്താവളങ്ങളിൽ 100 ശതമാനം സി.സി.ടി.വി കവറേജ് ഉറപ്പാക്കും. വിമാനങ്ങളിലും കേറ്ററിങ് സംവിധാനങ്ങളിലും കർശന പരിശോധന നടത്തും. സുരക്ഷാ നടപടികൾ സുഗമമാക്കാൻ യാത്രക്കാർ നേരത്തെ എത്തണമെന്ന് വിമാനക്കമ്പനികളും അറിയിച്ചു.