ന്യൂഡൽഹി: ഇന്ത്യൻ വിപണിയിൽ ഫോക്‌സ്‌വാഗൺ ഗോൾഫ് GTI-യുടെ ആദ്യ ബാച്ചിന്റെ ബുക്കിംഗ് പൂർത്തിയായതായി കമ്പനി പ്രഖ്യാപിച്ചു. 150 യൂണിറ്റുകൾ അടങ്ങുന്ന ഈ ബാച്ച് ഹാച്ച്ബാക്ക് ബുക്കിം​ഗ് വളരെ വേ​ഗത്തിൽ പൂർത്തിയായി. പോളോ GTI-ക്ക് ശേഷം GTI ബാഡ്ജുള്ള ഫോക്‌സ്‌വാഗന്റെ രണ്ടാമത്തെ മോഡലാണ് ഗോൾഫ് GTI. പൂർണമായും ഇന്ത്യയിൽ നിർമ്മിക്കുന്ന ഈ വാഹനം രാജ്യത്തെ കാർ പ്രേമികൾക്കിടയിൽ വൻ ആവേശം സൃഷ്ടിച്ചിരിക്കുകയാണ്.

നിലവിൽ എട്ടാം തലമുറയിൽ എത്തിനിൽക്കുന്ന ഗോൾഫ് GTI, കിംഗ്സ് റെഡ് പ്രീമിയം, ഗ്രെനഡില്ല ബ്ലാക്ക് മെറ്റാലിക്, ഒറിക്സ് വൈറ്റ് പ്രീമിയം എന്നീ കളർ സ്കീമുകളിൽ ലഭ്യമാണ്. സ്പോർട്ടി ഡിസൈനാണ് വാഹനത്തിന്റെ പ്രധാന ആകർഷണം. അലോയ് വീലുകളുടെ അതുല്യമായ രൂപകൽപ്പന, ഫ്രണ്ട് ബമ്പറിലെ കറുത്ത വിശദാംശങ്ങൾ, സിംഗിൾ എക്‌സ്‌ഹോസ്റ്റ് ഔട്ട്‌ലെറ്റ്, മുൻഡോറിലെ GTI എംബ്ലം എന്നിവ വാഹനത്തിന് കൂടുതൽ പ്രൗഢി പകരുന്നു.

ആധുനിക ഇന്റീരിയർ, അത്യാധുനിക സാങ്കേതികവിദ്യ ഗോൾഫ് GTI-യുടെ ഇന്റീരിയർ ആധുനിക സൗകര്യങ്ങളാൽ സമ്പന്നമാണ്. ചാറ്റ് ജിപിടി പിന്തുണയ്ക്കുന്ന വോയ്‌സ് കമാൻഡുകളോട് കൂടിയ 12.9 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, ചുവന്ന ഹൈലൈറ്റുകളുള്ള GTI- ഡിജിറ്റൽ ഡിസ്‌പ്ലേ, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, മൾട്ടി-സോൺ ക്ലൈമറ്റ് കൺട്രോൾ, വെന്റിലേറ്റഡ്, പവർഡ് ഫ്രണ്ട് സീറ്റുകൾ എന്നിവ ഇതിൽ ഉൾപ്പെടുന്നു.

2.0 ലിറ്റർ ടർബോ-പെട്രോൾ എഞ്ചിനാണ് ഗോൾഫ് GTI-യുടെ കരുത്ത്. 265 എച്ച്പി കരുത്തും 370 എൻഎം ടോർക്കും ഉത്പാദിപ്പിക്കുന്ന ഈ എഞ്ചിൻ, 7-സ്പീഡ് ഡ്യുവൽ-ക്ലച്ച് ഓട്ടോമാറ്റിക് ട്രാൻസ്മിഷനുമായി ചേർന്ന് മുൻ ചക്രങ്ങളിലേക്ക് പവർ എത്തിക്കുന്നു. ഇലക്ട്രോണിക് ആയി നിയന്ത്രിത ഫ്രണ്ട്-ആക്‌സിൽ ഡിഫറൻഷ്യൽ ലോക്കും വാഹനത്തിൽ ഉൾപ്പെടുത്തിയിട്ടുണ്ട്. 5.9 സെക്കൻഡിനുള്ളിൽ 0-100 കിമി/മണിക്കൂർ വേഗത കൈവരിക്കാൻ വാഹനത്തിന് സാധിക്കുമെന്ന് ഫോക്‌സ്‌വാഗൺ അവകാശപ്പെടുന്നു. പരമാവധി വേഗത മണിക്കൂറിൽ 250 കിലോമീറ്ററായി ഇലക്ട്രോണിക് ആയി പരിമിതപ്പെടുത്തിയിരിക്കുന്നു.

ടിഗുവാൻ ആർ-ലൈനും വിപണിയിൽഗോൾഫ് GTI-യുടെ വരവിന് പിന്നാലെ, ഫോക്‌സ്‌വാഗൺ അടുത്തിടെ ടിഗുവാൻ ആർ-ലൈൻ എസ്‌യുവിയും ഇന്ത്യയിൽ അവതരിപ്പിച്ചു. പ്രകടനത്തെ അടിസ്ഥാനമാക്കിയുള്ള ഈ മോഡൽ വിപണിയിൽ ശ്രദ്ധ നേടിക്കഴിഞ്ഞു.