അബൂദബി: സുഡാനിലെ സൈനിക സര്‍ക്കാരുമായി സംഘര്‍ഷത്തില്‍ ഏര്‍പ്പെട്ടിരിക്കുന്ന അര്‍ധസൈനിക റാപ്പിഡ് സപ്പോര്‍ട്ട് ഫോഴ്‌സിന് (ആര്‍എസ്എഫ്) ചൈനീസ് നിര്‍മ്മിത ആയുധങ്ങള്‍ വിതരണം ചെയ്യുന്നെന്ന വാര്‍ത്ത നിഷേധിച്ച് യുണൈറ്റഡ് അറബ് എമിറേറ്റ്‌സ് (യുഎഇ).

കഴിഞ്ഞ ദിവസം പുറത്തിറങ്ങിയ ആംനസ്റ്റി ഇന്റര്‍നാഷണല്‍ റിപ്പോര്‍ട്ടിലുള്ള ആരോപണങ്ങള്‍ അടിസ്ഥാനരഹിതവും ഈ ആരോപണത്തെ സാധൂകരിക്കാന്‍ യാതൊരു തരത്തിലുള്ള തെളിവുകള്‍ ഇല്ലെന്നും യുഎഇയുടെ സുരക്ഷാ, സൈനിക കാര്യ സഹമന്ത്രി സലീം അല്‍ജാബിരി പറഞ്ഞു.

ആര്‍എസ്എഫിന് യുഎഇ ആയുധം നല്‍കുന്നുവെന്ന ഐക്യരാഷ്ട്രസഭ, യുണൈറ്റഡ് സ്റ്റേറ്റ്‌സ്, വിവിധ എന്‍ജിഒകള്‍ എന്നിവരുടെ ആരോപണങ്ങള്‍ യുഎഇയെ വളരെക്കാലമായി പിന്തുടരുന്നുണ്ട്.

'സുഡാനില്‍ നടന്നുകൊണ്ടിരിക്കുന്ന സംഘര്‍ഷത്തില്‍ ഉള്‍പ്പെട്ടിരിക്കുന്ന ഏതെങ്കിലും കക്ഷിക്ക് തങ്ങള്‍ ആയുധങ്ങള്‍ വിതരണം ചെയ്യുന്നുണ്ടെന്ന ആരോപണം യുഎഇ ശക്തമായി നിരസിക്കുന്നു,' വിദേശകാര്യ മന്ത്രാലയം എക്‌സില്‍ പങ്കിട്ട പ്രസ്താവനയില്‍ അല്‍ജാബിരി പറഞ്ഞു.

ഖാര്‍ത്തൂമിലും ദാര്‍ഫറിലും നടന്ന ആക്രമണങ്ങളുടെ ദൃശ്യങ്ങളില്‍ നിന്നും ആര്‍എസ്എഫ് പട്ടാളക്കാര്‍ ചൈനീസ് ജിബി 50 എ ഗൈഡഡ് ബോംബുകളും 155 എംഎം എഎച്ച് 4 ഹോവിറ്റ്‌സറുകളും ഉപയോഗിക്കുന്നുണ്ടെന്ന് വ്യക്തമായതായി ആംനസ്റ്റി വ്യാഴാഴ്ച പറഞ്ഞിരുന്നു.

സ്റ്റോക്ക്‌ഹോം ഇന്റര്‍നാഷണല്‍ പീസ് റിസര്‍ച്ച് ഇന്‍സ്റ്റിറ്റ്യൂട്ടില്‍ നിന്നുള്ള ഡാറ്റ ഉദ്ധരിച്ച്, ചൈനയില്‍ നിന്ന് ഹോവിറ്റ്‌സറുകള്‍ വാങ്ങിയ ഏക രാജ്യം യുഎഇ മാത്രമാണെന്നും സംഘടന പറയുന്നു.

The UAE government has officially denied allegations of supplying Chinese-manufactured weapons to Sudan.