സോറി, എന്നോട് ക്ഷമിക്കൂ, ഇനി ഞാൻ അങ്ങനെ ചെയ്യില്ല ഇങ്ങനെയൊക്കെയാണോ നിങ്ങൾ ഒരാളോട് ക്ഷമാപണം നടത്തുന്നത് ? എന്നാൽ  മറ്റൊരാളോട് ക്ഷമാപണം നടത്തുമ്പോൾ ഉപയോഗിക്കുന്ന വാക്കുകളുടെ നീളം അതിന്റെ ആത്മാർത്ഥതയെ സ്വാധീനിക്കുമെന്നാണ് പുതിയ പഠനം സൂചിപ്പിക്കുന്നത്. നീളമുള്ള വാക്കുകൾ ഉപയോഗിക്കുന്ന ക്ഷമാപണങ്ങൾ കൂടുതൽ വിശ്വാസ്യത നേടുന്നതായി ഗവേഷണം വ്യക്തമാക്കുന്നു. സോറി എന്ന് ആർക്കും പറയാവുന്നതും എളുപ്പവുമാണെന്നും, പക്ഷേ അതിന്റെ ആത്മാർത്ഥതയാണ് പ്രധാനം. ക്ഷമാപണത്തിൽ ദീർഘമായ വാക്കുകൾ ഉപയോഗിക്കുന്നത് കൂടുതൽ വിശ്വാസ്യത നേടുമെന്ന് പുതിയ ഗവേഷണം വെളിപ്പെടുത്തുന്നു. നീളമുള്ള വാക്കുകൾ ഉച്ചരിക്കാനും എഴുതാനും കൂടുതൽ പരിശ്രമം വേണ്ടതിനാൽ, അവ ക്ഷമാപണത്തിന്റെ ആത്മാർത്ഥത വർധിപ്പിക്കുന്നുവെന്നാണ് സൂചിപ്പിക്കുന്നത്.

 പഠനം കണ്ടെത്തിയത് പ്രകാരം പണമോ സമയമോ പരിശ്രമമോ ചെലവഴിക്കുന്ന ക്ഷമാപണങ്ങൾ കൂടുതൽ ഫലപ്രദമാണെന്നാണ്. ആത്മാർത്ഥമായ ക്ഷമാപണം ആളുകളിൽ സുഖാനുഭവം ഉണ്ടാക്കുകയും തെറ്റ് ചെയ്തവരുമായി വീണ്ടും സഹകരിക്കാനുള്ള സാധ്യത വർധിപ്പിക്കുകയും ചെയ്യും. എന്നാൽ, അപൂർവമായ വാക്കുകൾ മനസ്സിലാക്കാൻ ബുദ്ധിമുട്ടായതിനാൽ, നീളമുള്ളതും എന്നാൽ സാധാരണവുമായ വാക്കുകൾ തിരഞ്ഞെടുക്കുന്നതാണ് ഉചിതമെന്ന് ഗവേഷകർ അഭിപ്രായപ്പെടുന്നു.

ഫലപ്രദമായ ക്ഷമാപണത്തിന്റെ ഘടകങ്ങൾ

ക്ഷമിക്കണം" എന്നത് ഒരു തുടക്കം മാത്രമാണ്. ശരിയായ ക്ഷമാപണത്തിൽ ഇനിപ്പറയുന്ന ഘടകങ്ങൾ ഉൾപ്പെടണമെന്ന് വിദഗ്ധർ ചൂണ്ടിക്കാട്ടുന്നു. തെറ്റ് ചെയ്തതിന്റെ വ്യക്തമായ അംഗീകാരം. പ്രവൃത്തിയുടെ ഉത്തരവാദിത്തം ഏറ്റെടുക്കൽ. പശ്ചാത്താപവും സഹാനുഭൂതിയും പ്രകടിപ്പിക്കൽ. ഉണ്ടായ കേടുപാടുകൾ പരിഹരിക്കാനുള്ള ഓഫർ. പെരുമാറ്റം മാറ്റാനുള്ള ഉദ്ദേശ്യത്തിന്റെ പ്രഖ്യാപനം.

പഠനത്തിന്റെ കണ്ടെത്തലുകൾ

രണ്ട് ഗവേഷണങ്ങളാണ് ഈ വിഷയത്തിൽ നടത്തിയത്. ആദ്യ പഠനത്തിൽ, X-ലെ 50 ക്ഷമാപണ ട്വീറ്റുകൾ വിശകലനം ചെയ്തു. ഈ ട്വീറ്റുകളിൽ ദീർഘമായ വാക്കുകൾ കൂടുതലായി ഉപയോഗിച്ചതായി കണ്ടെത്തി. രണ്ടാമത്തെ പഠനത്തിൽ, നീളമുള്ള വാക്കുകൾ ഉപയോഗിച്ച ക്ഷമാപണങ്ങൾ കൂടുതൽ ആത്മാർത്ഥമായി തോന്നുന്നുവെന്ന് ആളുകൾ വിലയിരുത്തി. എന്നാൽ, അപൂർവ വാക്കുകൾ ഈ ഫലത്തെ സ്വാധീനിച്ചില്ല.

ക്ഷമാപണത്തിന്റെ ശക്തി

നീളമുള്ള വാക്കുകൾ ഉപയോഗിക്കുന്നത് ക്ഷമാപണത്തിന്റെ ശ്രമത്തെ പ്രകടമാക്കുകയും അതിനെ കൂടുതൽ വിശ്വസനീയമാക്കുകയും ചെയ്യുന്നു. "അടുത്ത തവണ ക്ഷമാപണം നടത്തുമ്പോൾ, ഒന്ന് ആലോചിച്ച് നീളമുള്ള, എന്നാൽ സാധാരണ വാക്കുകൾ തിരഞ്ഞെടുക്കൂ," ഗവേഷകർ ഉപദേശിക്കുന്നു. ഇത്തരം ക്ഷമാപണങ്ങൾ ബന്ധങ്ങൾ ശക്തിപ്പെടുത്താനും തെറ്റുകൾ പരിഹരിക്കാനും സഹായിക്കുമെന്നാണ് വിലയിരുത്തൽ.