ബ്രസീൽ: ഇതിഹാസ പരിശീലകൻ കാർലോ അൻസലോട്ടിയെ ബ്രസീലിയൻ ദേശീയ ഫുട്ബോൾ ടീമിന്റെ പുതിയ പരിശീലകനായി നിയമിച്ചു. ഈ സീസൺ അവസാനിക്കുന്നതോട് കൂടി കാർലോ ആൻസലോട്ടി റയൽ വിടുമെന്ന് നേരത്തെ അറിയിച്ചിരുന്നു. ഇതിനു പിന്നാലെയാണ് ഇറ്റാലിയൻ പരിശീലകനെ ബ്രസീൽ സ്വന്തമാക്കിയത്. ഈ മാസം 26 മുതലായിരിക്കും ആൻസലോട്ടി ബ്രസീലിന്റെ പരിശീലകനായി ചുമതലയേൽക്കുക. റയലിനൊപ്പമുള്ള അൻസലോട്ടിയുടെ കരാർ 2026ൽ ആണ് അവസാനിക്കുന്നത്. എന്നാൽ അൻസലോട്ടി കരാർ പൂർത്തിയാകുന്നതിന് മുമ്പ് തന്നെ റയൽ വിടാൻ തീരുമാനിക്കുകയായിരുന്നു. 

റയൽ മാഡ്രിഡിന്റെ ചരിത്രത്തിലെ ഏറ്റവും മികച്ച പരിശീലകരിൽ ഒരാളാണ് ആൻസലോട്ടി. റയലിനായി ഏറ്റവും കൂടുതൽ കിരീടങ്ങൾ നേടിക്കൊടുത്ത പരിശീലകനാണ് അൻസലോട്ടി. രണ്ട് വീതം ലാ ലിഗ, യുവേഫ ചാമ്പ്യൻസ് ലീഗ്, യുവേഫ സൂപ്പർ കപ്പ്, സ്പാനിഷ് സൂപ്പർ കപ്പ് ഒരു കോപ്പ ഡെൽറേ, ഫിഫ ക്ലബ് ലോകകപ്പ്, ഫിഫ ഇൻ്റർകോണ്ടിനെൻ്റൽ കപ്പ് എന്നീ കിരീടങ്ങളാണ് അൻസലോട്ടിയുടെ നേതൃത്വത്തിൽ റയൽ സ്വന്തമാക്കിയത്.

അൻസലോട്ടിയുടെ കീഴിൽ 2024ലെ ഇന്റർകോണ്ടിനെന്റൽ കപ്പ് റയൽ സ്വന്തമാക്കിയിരുന്നു. പാച്ചുക്കയെ എതിരില്ലാത്ത മൂന്നു ഗോളുകൾക്ക് പരാജയപ്പെടുത്തിയാണ് റയൽ മാഡ്രിഡ് ചാമ്പ്യന്മാരായത്. റയൽ മാഡ്രിഡിന്റെ നാലാമത്തെ ഇന്റർകോണ്ടിനെന്റൽ കിരീടമായിരുന്നു ഇത്. ഏറ്റവും കൂടുതൽ തവണ ഇന്റർകോണ്ടിനെന്റൽ കിരീടം സ്വന്തമാക്കുന്ന ടീമെന്ന നേട്ടവും റയൽ സ്വന്തമാക്കിയിരുന്നു. 

സമീപകാലങ്ങളിൽ അത്ര മികച്ച പ്രകടനം നടത്താൻ ബ്രസീലിയൻ ടീമിന് സാധിച്ചിട്ടില്ല. 2026 ഫിഫ ലോകകപ്പ് യോഗ്യത മത്സരത്തിൽ അർജന്റീനക്കെതിരെ ബ്രസീൽ പരാജയപ്പെട്ടിരുന്നു. കാനറി പടയെ ഒന്നിനെതിരെ നാല് ഗോളുകൾക്കാണ് അര്ജന്റീന തകർത്തു വിട്ടത്. ചരിത്രത്തിൽ ആദ്യമായാണ് ബ്രസീൽ സൗത്ത് അമേരിക്കൻ ലോകകപ്പ് യോഗ്യതയിൽ ഒരു മത്സരത്തിൽ നാല് ഗോളുകൾ വഴങ്ങുന്നത്. 

നിലവിൽ ലോകകപ്പ് യോഗ്യത മത്സരങ്ങളുടെ പട്ടികയിൽ ബ്രസീൽ നാലാം സ്ഥാനത്താണ് ഉള്ളത്. 14 മത്സരങ്ങളിൽ നിന്നും ആറ് വിജയവും മൂന്നു സമനിലയും അഞ്ചു തോൽവിയും അടക്കം 21 പോയിന്റ് ആണ് ബ്രസീലിന്റെ കൈവശമുള്ളത്.

Legendary coach Carlo Ancelotti has been appointed as the new coach of the Brazilian national football team