തിരുവനന്തപുരം: തിരുവനന്തപുരത്തെ നന്തൻകോട് കൂട്ടക്കൊലപാതക കേസിലെ പ്രതിയായ കേഡൽ ജിൻസൺ രാജയ്ക്ക് വധശിക്ഷ നൽകണമെന്ന് പ്രോസിക്യൂഷൻ ആവശ്യത്തിൽ ഇന്ന് വാദം കേൾക്കും. നാലു പേരെ കൂട്ടക്കൊല ചെയ്ത ഈ കേസ് അപൂർവങ്ങളിൽ അപൂർവമായി സംഭവിക്കുന്നതെന്നാണ് പ്രോസിക്യൂഷൻ വാദം. സാത്താൻ പൂജയ്ക്കായി അമ്മയെയും അച്ഛനെയും സഹോദരിയെയും അടക്കം കൊലപ്പെടുത്തിയ കേസിൽ കേഡൽ ജിൻസൺ രാജ മാത്രമാണ് പ്രതിയായിട്ട് ഉള്ളത്.

തിരുവനന്തപുരം ആറാം അഡീഷണൽ സെക്ഷൻസ് കോടതി ജഡ്ജിയായ കെ വിഷ്ണുവാണ് കേസിലെ വിധി പ്രസ്താവിക്കുക. നന്തൻകോടുള്ള 2017 ഏപ്രിൽ 9ന് ആയിരുന്നു ക്ലിഫ് ഹൗസിന് സമീപം ബെയ്ന്സ് കോമ്പൗണ്ടിലെ 117 നമ്പർ വീട്ടിൽ പ്രൊഫസർ രാജാ തങ്കം, ഭാര്യ ഡോക്ടർ ജീൻ പത്മ, മകൾ കരോലിൻ, ബന്ധു ലളിത എന്നിവരെ മരിച്ച നിലയിൽ കണ്ടെത്തിയത്. സംഭവത്തിൽ അച്ഛൻ അമ്മ സഹോദരി എന്നീ മൂന്ന് ആളുകളുടെ മൃതദേഹങ്ങൾ പൂർണമായും കത്തിക്കഴിഞ്ഞ നിലയിലും ബന്ധുവിന്റെ മൃതദേഹം വെട്ടി നുറുക്കി പുഴുവരിച്ച നിലയിലും ആയിരുന്നു ഉണ്ടായിരുന്നത്. കൊലപാതകം നടത്തിയതിനുശേഷം കേഡൽ ജിൻസൺ രാജ ഒളിവിൽ പോവുകയായിരുന്നു. തുടർന്ന് ദിവസങ്ങൾക്കകം പൊലിസ് പ്രതിയെ പിടികൂടുകയായിരുന്നു.

ആസ്ട്രൽ പ്രൊജക്ഷൻ എന്ന സാത്താൻ ആരാധനയുടെ ഭാഗമായിട്ടാണ് പ്രതി ഇത്തരത്തിൽ കൊലപാതകങ്ങൾ നടത്തിയത് എന്നാണ് പൊലിസ് പറയുന്നത്. പ്രതിക്ക് മാതാപിതാക്കളോട് വിരോധം ഉണ്ടെന്നും കുറ്റപത്രത്തിൽ പറയുന്നുണ്ട്. കൊലപാതകം, വീട് അഗ്നിക്കിരയാക്കൽ, തെളിവു നശിപ്പിക്കൽ എന്നീ കുറ്റങ്ങളാണ് കേസിൽ പ്രതിക്ക് മേലെ ചുമത്തിയിട്ടുള്ളത്.

Nanthancode massacre Prosecution demands death penalty for accused sentencing today